वसईतील सांडोर परिसरात राहणारे पती जेराल्ड परेरा आणि पत्नी प्रिया परेरा हे दाम्पत्य पर्यटनासाठी फिलिपिन्स देशात गेले होते. त्या ठिकाणी फिरण्यासाठी त्यांनी भाडेतत्त्वावर दुचाकी घेतली होती. भाडेतत्त्वावर फिरण्यासाठी घेतलेल्या दुचाकीवरून दाम्पत्य जात असताना त्यांच्या दुचाकीला एका ट्रकने जोरदार धडक दिली. ट्रकच्या या धडकेत दुचाकी एका सिमेंटच्या खांबाला धडकून भीषण अपघात घडला. याच अपघातात या पती पत्नीचा मृत्यू झाला आहे.

पत्नीचा जागीच मृत्यू, तर पतीचा उपाचारदरम्यान मृत्यू

शनिवारी (10 मे) सकाळच्या सुमारास फिलिपिन्स येथील बडियान परिसरात हा भीषण अपघात घडल्याची माहिती आहे. या अपघातात गंभीररित्या जखमी झाल्याने पत्नी प्रिया परेरा यांचा जागीच मृत्यू झाला. तर, या अपघातात गंभीररित्या जखमी झाल्याने जेराल्ड परेरा यांना रुग्णालयात उपचारासाठी दाखल करण्यात आले. तिथे उपचारादरम्यान त्यांची प्राणज्योत मालवली.
Chh. Sambhajinagar News: चुलत बहिणीच्या लग्नासाठी पुण्याहून गावी, शेतात गेला अन्… मुलाची अवस्था पाहून बापाचा टाहो
अपघातात जखमी झाल्यानंतर जेराल्ड परेरा यांनी स्वत: वसई – माणिकपूर येथील चर्चमधील धर्मगुरू फादर रेमंड रुमाव यांना फोन करून या दुर्घटनेची माहिती दिली. त्यामुळे या अपघाताची माहिती परेरा कुटुंबीयांना व सांडोर परिसरातील नागरिकांना मिळाली. या अपघाताची माहिती दिल्यानंतर अपघातात जखमी झालेले जेराल्ड परेरा यांचा देखील उपचारादरम्यान मृत्यू झाला आहे. मृत दाम्पत्याचे कुटुंबीय फिलिपिन्स येथे गेले असून त्यांचे मृतदेह वसईत आणण्यासाठी प्रयत्न सुरू आहेत.

पर्यटनासाठी फिलिपिन्स जेराल्ड आणि प्रिया परेरा या दाम्पत्याचा अपघातात दुर्दैवी मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. या घटनेने परिसरात सर्वत्र हळहळ व्यक्त होत आहे.