याबाबत सविस्तर वृत्त असे की, अलिबाग पासून हाकेच्या अंतरावर असणाऱ्या एका गावात आरोपी प्रसाद अरुण भगत हा १० मे २०२५ रोजी रात्री साडे आठ वाजेच्या सुमारास 36 वर्षीय पीडित महिलेच्या घरात शिरला. यावेळी महिलेची मोठी मुलगी ही कामावर गेलेली असताना, तसेच लहान मुलगी ही शेजाऱ्याकडे खेळण्यासाठी गेली होती. त्यावेळी आरोपी प्रसाद अरुण भगत याने संधीचा फायदा घेत घरात प्रवेश केला. त्यावेळी पीडित महीला ही भांडी घासत होती. आरोपीने मागून येऊन पीडितेच्या कमरेला मिठी मारीत विनयभंग करत लैंगिक अत्याचार केला.

यावेळी पीडित महिला ही त्याच्या तावडीतून सुटण्यासाठी प्रयत्न करत होती. यासाठी पीडितेने आरडाओरडा केला म्हणून आरोपी प्रसाद भगत याने पीडित महिलेच्या कानाखाली मारली आणि तिथून पळ काढला. केंद्रात आणि राज्यात सत्तेत असणाऱ्या एका राजकीय पक्षाच्या पदाधिकारी यांच्या चालकाने केलेले प्रताप पाहून स्थानिक नागरिकांनी संताप व्यक्त केला आहे.

सत्तेतलाच पदाधिकारी असलेल्या नेत्याच्या चालकाकडून महिलेचा विनयभंग करण्याचा प्रकार घडल्याने महिला सुरक्षेचा प्रश्न अधिकच गंभीर होऊ लागला आहे. या घटनेनंतर अलिबाग पोलीस ठाण्यात त्याच्या विरोधात रात्री 11 वाजून 32 मिनिटानी गुन्हा दाखल करण्यात आला. याबाबत अधिक तपास पोलीस निरीक्षक किशोर साळे यांच्या मार्गदर्शनाखाली पोलिस उप निरीक्षक मराठे हे करीत आहेत.