पुणे महापालिकेत स्वबळावर भाजपचे १०५ पेक्षा अधिक नगरसेवक निवडून आणू असं भाजप शहराध्यक्ष धीरज घाटे यांनी सांगितलं आहे. मात्र, जर महायुती म्हणून लढलो तर गेल्या ३ वर्षांपासून निवडणुकीच्या प्रतिक्षेत असणारे आणि गुडघ्याला बाशिंग बांधून तयार असणाऱ्या इच्छुकांना मात्र आपल्याला तिकीट मिळणार की नाही, याची शाश्वती नाही. त्यामुळे अनेक स्थानिक पदाधिकारी, कार्यकर्ते हे ‘एकला चलो’चा भूमिकेत असल्याचं पाहायला मिळत आहे. काही झालं तरी आम्हाला पुण्यामध्ये महायुती नको असं पुण्यातील अनेक पदाधिकारी आणि कार्यकर्ते खासगीत बोलत आहेत.
Kalyan BJP : कल्याणात भाजपचा दुटप्पीपणा? एकीकडे बांगलादेशी घुसखोरांविरुद्ध मोहीम, दुसरीकडे त्यांच्यासाठी वकिलीचा आरोप
दुसरीकडे, पुण्यामध्ये भाजपची मोठी ताकद असून स्वबळावर महापालिकेमध्ये भाजपची सत्ता येऊ शकते असा विश्वास स्थानिक नेतृत्वाला वाटत आहे. पुणे शहरात भाजपचे संघटन मजबूत आहे. भाजपकडून नुकतीच शहरात साडेपाच लाख प्राथमिक पक्ष सदस्यांची नोंदणी देखील पूर्ण करण्यात आली आहे. त्याबरोबर नऊ हजार सक्रिय सदस्य नोंदणीचे काम भाजपाने हाती घेतले आहे. गेल्या निवडणुकीचा विचार केल्यास भाजपची पुणे महापालिकेमध्ये एक हाती सत्ता होती. २०१७ च्या निवडणुकीत भाजपचे तब्बल १०० नगरसेवक निवडून आले होते. तसेच २०१७ ला निवडणूक लढवून विजयी झालेल्या शिवसेना (उबाठा)च्या पाच माजी नगरसेवकांनी नुकताच भाजपमध्ये प्रवेश केला आहे. त्यामुळे सध्या परिस्थितीला २०१७ ला निवडणूक लढवून जिंकलेले असे भाजपकडे १०५ माजी नगरसेवक आहेत. त्यामुळे यावेळी १०५ हून अधिक नगरसेवक निवडून आणण्याचे आमचे उद्दिष्ट आहे, असं शहराध्यक्ष धीरज घाटे यांनी सांगितलं आहे.

तर, लोकसभा आणि विधानसभा निवडणुकीत पुणेकरांनी भाजपला निर्विवाद यश मिळवून दिले आहे. पुणे लोकसभा भाजपाने जिंकलीच मात्र विधानसभेला देखील भाजपने लढवलेल्या सहा पैकी सहा आमदार निवडून देत शतप्रतिशत विजय भाजपचा पुण्यात झाला आहे. पंतप्रधान नरेंद्र मोदी यांच्या नेतृत्वातील केंद्र सरकार आणि देवेंद्र फडणवीस यांच्या नेतृत्वातील राज्य सरकार यांच्या माध्यमातून पुणे आणि परिसरात खूप मोठ्या प्रमाणात विकासकामे सुरू आहेत. महापालिकेतील पाच वर्षांच्या सत्ता काळात भाजपने मोठ्या प्रमाणात पायाभूत विकासकामे केली आहेत. त्यामुळेच लोकसभा, विधानसभा निवडणुकीप्रमाणे महापालिकेतही पुणेकर भाजपला विजयी करतील असा विश्वास वाटतो. असं धीरज घाटे यांनी सांगितले आहे.

मात्र, एकीकडे स्थानिक स्वराज्य संस्थांच्या निवडणुकीत महयुती एकत्रित लढेल. एखाद्या ठिकाणी एखादा वेगळा निर्णय स्थानिक स्तरावर होऊ शकतो. पण धोरण म्हणून स्थानिक स्वराज्य संस्थांच्या निवडणुका महायुती एकत्र लढेल, अशी माहिती मुख्यमंत्री देवेंद्र फडणवीस यांनी दिली आहे. तर दुसरीकडे भाजप शहराध्यक्षांनी आपली शहरातील ताकद अधोरेखित करून पक्ष एकट्याच्या जोरावर महापालिकेत सत्तेत बसेल असे संकेत दिल्यामुळे. फडणवीस यांच्या म्हणण्याप्रमाणे एखाद्या ठिकाणी स्थानिक स्तरावर निर्णय होऊ शकतो तर ते एखादे ठिकाण हे पुणेच असू शकते याचं कारण म्हणजे निवडणुका घेण्याचं सांगताच पुण्यातील स्थानिक भाजपच्या पदाधिकाऱ्यांनी स्वबळावर लढण्याची दाखवलेली तयारी. आता येत्या स्थानिक स्वराज्य संस्थेच्या निवडणुकांमध्ये पुण्यामध्ये महायुती म्हणून लढणार की भाजप स्वबळावर निवडणुकांना सामोरे जाणार हे येत्या काळात स्पष्ट होईलच.