ATS Big Action in Pune : पुणे जिल्ह्यातील जुन्नर तालुक्यात एटीएसने मोठी कारवाई केली. ओतूरमध्ये दोन बांगलादेशी तरुणांना ताब्यात घेण्यात आलं आहे. त्यांच्याकडे बनावट आधार कार्ड आणि पॅन कार्ड सापडले. हे युवक बेकायदेशीरपणे भारतात आले होते. बनावट कागदपत्रांच्या आधारे ते ओळख लपवत होते. पुणे ग्रामीण पोलीस आणि एटीएस त्यांची चौकशी करत आहेत. या प्रकरणी अधिक तपास सुरू आहे. सुरक्षा यंत्रणा अधिक माहिती मिळवण्याचा प्रयत्न करत आहे.
तपासात असे समोर आले की, हे युवक बांगलादेशहून बेकायदेशीरपणे भारतात दाखल झाले होते आणि बनावट कागदपत्रांच्या आधारे स्थानिक पातळीवर आपली ओळख लपवत होते. त्यांनी बनावट आधार, पॅन कार्ड आणि ड्रायव्हिंग लायसन्सचा वापर करून स्थानिक व्यवहार आणि नोकरीसाठी प्रयत्न केल्याची शक्यता आहे. या प्रकरणात आणखी काही व्यक्तींचा सहभाग असण्याची शक्यता तपासली जात आहे.
पुणे ग्रामीण पोलीस आणि एटीएस यांनी संयुक्तपणे या युवकांची कसून चौकशी सुरू केली आहे. त्यांच्या बांगलादेशातील संपर्क, भारतातील प्रवेश मार्ग आणि बनावट कागदपत्रे बनवण्यातील मध्यस्थ यांच्याबाबत माहिती गोळा केली जात आहे. याप्रकरणी बेकायदेशीर स्थलांतर, बनावट कागदपत्रे आणि संभाव्य दहशतवादी कृत्यांशी संबंधित गुन्हे दाखल होण्याची शक्यता आहे.
या कारवाईमुळे पुणे जिल्ह्यातील सुरक्षा यंत्रणेची सतर्कता पुन्हा एकदा अधोरेखित झाली आहे. स्थानिक नागरिकांनीही संशयास्पद व्यक्ती किंवा कृत्यांबाबत तात्काळ पोलिसांना माहिती देण्याचे आवाहन एटीएसने केले आहे. या प्रकरणी अधिक तपास सुरु आहे.
दरम्यान, गेल्या काही दिवसांपासून भारतीय सुरक्षा यंत्रणांकडून घुसखोरांना पकडण्यासाठी विशेष मोहीम राबवली जात आहे. देशभरात अनेक ठिकाणी बांगलादेशातून भारतात घुसखोरी करुन राहणाऱ्या अनेकांना आतापर्यंत पकड्यात आलं आहे. बांगलादेशातून भारतात घुसखोरी करणाऱ्यांमुळे देशाच्या सुरक्षेचा देखील प्रश्न उपस्थित होऊ शकतो. त्यामुळे सुरक्षा यंत्रणांकडून याबाबत कठोर कारवाई केली जाते. पुण्यात करण्यात आलेली कारवाई देखील तशीच एक आहे. या कारवाईत काही मोठी माहिती मिळते का? ते पाहणं महत्त्वाचं आहे.