याबाबत पोलीस निरीक्षक महेंद्र जगताप यांनी सांगितले की, सांगली जिल्ह्यातील कासेगाव येथे रहिमतुल्ला हा मोबाईल दुरूस्तीचा व्यवसाय करत होता. तो कामानिमित्त सोमवारी दुपारी कासेगावहून कराडच्या दिशेने येत असताना कराड तालुक्यातील वाठार गावच्या हद्दीत आल्यानंतर संशयित सात युवकांनी त्याचे अपहरण केले. अपहरण केल्यानंतर वाठारसह परिसरात संशयितांनी लोखंडी रॉड, लाकडी दांडके, पीव्हीसी पाईपच्या मदतीने रहिमतुल्ला याला जबर मारहाण केली. संध्याकाळी सव्वापाच वाजण्याच्या सुमारास संशयितांनी त्याला कासेगाव येथील घरी सोडले. त्यानंतर रहिमतुल्ला तेथील एका रुग्णालयात उपचारासाठी गेला. मात्र, पोलीस ठाण्यात तक्रार दिली आहे का? अशी दवाखान्यात विचारणा केल्यानंतर कासेगाव पोलीस ठाण्यात गेला. पोलिसांनी वैद्यकीय तपासणीसाठी रुग्णालयात पाठवल्यानंतर अचानकपणे रहिमतुल्लाची प्रकृती खालावली. त्यामुळे त्याला उपचारासाठी तातडीने कराडच्या कृष्णा रुग्णालयात दाखल करण्यात आले. मात्र उपचारावेळी रहिमतुल्लाचा मृत्यू झाला.

दरम्यान, या प्रकरणी रहिमतुल्ला याच्या भावाने कराड तालुका पोलीस ठाण्यात खुनाचा गुन्हा नोंद झाला आहे. पोलिसांनी सात संशयित युवकांना अटक केली. यात मुख्य संशयित राकेश रामदास पाटील (वय २६) याच्यासह सुदाम मोहन पवार (वय २७), विशाल हणमंत शिंदे (वय २३), अमर सुरेश खोत (वय २७), विराज युवराज तोडकर (वय २६), उमेश रवींद्र पाटील (वय २८) आणि ऋषीकेश धनाजी तोडकर (वय २६, सर्व रा. कासेगाव, ता. वाळवा) अशी संशयितांची नावे आहेत. पुढील तपास सहाय्यक पोलीस निरीक्षक बिराजदार करत आहेत.

दरम्यान, संशयित आरोपींना आज प्रथमवर्ग न्यायदंडाधिकाऱ्यांसमोर हजर केले असता पोलीस कोठडी सुनावण्यात आली आहे.