अण्णा बनसोडे यांचा नुकताच वाढदिवसाचा कार्यक्रम पार पडला. या कार्यक्रमात अनेक जण त्यांना वाढदिवसाच्या शुभेच्छा देण्यासाठी गेले होते. या दरम्यान अण्णा बनसोडे यांना गुंड आकाश उर्फ आक्या बॉण्ड उर्फ सुमित मोहोळ हा केक भरवतो. त्याचा अण्णा बनसोडे यांना केक भरवतानाचे फोटो आणि व्हिडीओ समोर आले आहेत. विशेष म्हणजे गुंड आक्या बॉण्ड हा अतिशय आनंदाने अण्णा बनसोडे यांना केक भरवताना दिसतोय. यावेळी तिथे अण्णा बनसोडे यांचा मुलगा सिद्धार्थ हे देखील तिथे उपस्थित होते. गुंड आक्या बॉण्ड हा अण्णा बनसोडे यांना केक भरवत असल्याचं संबंधित व्हिडीओत दिसत आहे. दरम्यान, संबंधित व्हिडीओ समोर आल्यानंतर अण्णा बनसोडे हे गुन्हेगारीचं उदात्तीकरण करत नाहीत ना? अशी चर्चा राजकीय वर्तुळात रंगली आहे.

पुण्यात गुन्हेगारीने थैमान घातलं आहे. पोलिसांकडून गुन्हेगारी नष्ट करण्यासाठी प्रचंड प्रयत्न केले जात आहेत. पण तरीही गुन्हेगार हे सर्रासपणे गुन्हेगारी करताना दिसतात. आता तर गुन्हेगार चक्क विधानसभा उपाध्यक्षांना केक भरवण्यासाठी त्यांच्या वाढदिवसाच्या कार्यक्रमात पोहोचतात. त्यामुळे अनेकांच्या भुवया उंचावल्या आहेत. आक्या बॉण्ड हा पुण्यात कुप्रसिद्ध गुंड आहे. त्याच्यावर तब्बल 16 गुन्हे दाखल आहेत. अशा गुंडाने अण्णा बनसोडे यांना केक भरवल्याने या घटनेची चर्चा होत आहे. या घटनेवर अण्णा बनसोडे यांनी स्पष्टीकरण दिलं आहे.

अण्णा बनसोडे यांची प्रतिक्रिया काय?

अण्णा बनसोडे यांनी या घटनेवर प्रतिक्रिया दिली आहे. आपण आक्या बॉण्डला कधी भेटलोच नाही. त्यामुळे त्याला ओळखण्याचा संबंध नाही. त्याला वाढदिवसाच्या दिवशी पहिल्यांदाच पाहिलं. कार्यक्रमाला हजारो लोक शुभेच्छा द्यायला आले होते. त्यामध्ये तो एक होता. त्याचा आपल्याशी संबंध नाही आणि आपण गुन्हेगारीचं कधीच उदात्तीकरण करणार नाही, असं अण्णा बनसोडे यांनी स्पष्ट केलं आहे.