नागपूरमधील इंदिरा गांधी शासकीय वैद्यकीय महाविद्यालयात (मेयो) विद्यार्थ्यांच्या जेवणात अळ्या आढळल्या. यामुळे वसतिगृहात खळबळ उडाली. विद्यार्थ्यांनी तक्रार केल्यानंतर मेस चालकाला नोटीस बजावण्यात आली आहे. यानंतर केटरिंग सेवा तात्पुरती थांबवण्यात आली आहे. अन्न सुरक्षा विभागाने मेसची तपासणी केली आहे. तसेच दोषींवर कठोर कारवाई करण्याचे आश्वासन प्रशासनाने दिले आहे.
प्रशासनाने तातडीने लक्ष घालत मेस चालकाला नोटीस बजावली आहे. प्रशासनाकडून अन्न नमुने तपासणीसाठी पाठवण्यात आले आहेत. अधिष्ठाता डॉ. रवी चव्हाण आणि वैद्यकीय अधीक्षक डॉ. नितीन शेंडे यांनी स्पष्ट केले की, “विद्यार्थ्यांच्या आरोग्याशी कोणतीही तडजोड केली जाणार नाही. दोषींवर कठोर कारवाई केली जाईल.” तसेच, नवीन पुरवठादार शोधण्याची प्रक्रिया सुरू करण्यात आली आहे. या घटनेनंतर आरोग्य खात्याच्या अन्न सुरक्षा विभागानेही मेसची तपासणी केली आहे. स्वयंपाकघरात स्वच्छतेच्या निकषांचे उल्लंघन झाल्याचे स्पष्ट झाले आहे. यासंदर्भातील अहवाल काही दिवसांत सादर होणार आहे. या अहवालानंतर कठोर कारवाई केली जाण्याची शक्यता आहे.
मेयो वसतिगृहात शुद्ध पाणीही उपलब्ध नसल्याच्या तक्रारी
प्रियदर्शी संग्राम अशोक बहुउद्देशीय संस्थेने देखील मुख्यमंत्री देवेंद्र फडणवीस यांना निवेदन देत या प्रकारात हस्तक्षेप करण्याची मागणी केली आहे. संस्थेचे अध्यक्ष अनिकेत कुत्तरमारे यांनी सांगितले की, मेयो वसतिगृहात शुद्ध पाणीही उपलब्ध नसल्याच्या तक्रारी आहेत. मात्र प्रशासन याकडे दुर्लक्ष करत आहे. या प्रकारामुळे महाविद्यालय प्रशासनाची विश्वासार्हता धोक्यात आली आहे. विद्यार्थ्यांनी जेवणाच्या गुणवत्तेबाबत पूर्वीही तक्रारी केल्या असल्याचे समोर आले आहे. यापुढील काळात पारदर्शकता राखत मेस व्यवस्थापनावर नियमित देखरेख ठेवण्याची गरज असल्याची मागणी विद्यार्थी वर्गातून होत आहे.