राज्याची आर्थिक कशी बसवायची हा वरिष्ठ पातळीवरील विषय आहे. पण १५०० चे २१०० करु शकत नाही ही वस्तुस्थिती आहे, असं विधान सामाजिक न्यायमंत्री संजय शिरसाट यांनी केलं आहे. ‘अनेक जण लाडकी बहीण योजनेचा वेगळ्या अर्थानं बाऊ करतात की ही योजना बंद होणार का? योजनेला पैसे कमी मिळतात का? तसं काही नाही. त्या योजनेला आम्ही पैसे देणार आहोत. तो आमचा शब्द आहे आणि आम्ही तो पूर्ण करणार आहोत. राज्याच्या तिजोरीवर आर्थिक भार आलेला आहे. त्यासाठी वेगवेगळे पर्याय आहेत. भले कर्ज काढावं लागेल. पण आम्हाला लाडकी बहीण योजना बंद करता येणार नाही, ही वस्तुस्थिती आहे,’ असं शिरसाट म्हणाले.
Sanjay Raut : ‘…तर तुम्हाला परवडलं नसतं, राऊतांचे पवारांना रोखठोक बोल’; पहलगाम हल्ल्यावरुन काय म्हणाले?
लाडकी बहीण योजनेसाठी निधी अपुरा पडत असल्यानं आदिवासी विकास, सामाजिक न्याय विभागांचा निधी महिला आणि बालकल्याण खात्याकडे वळवला जात आहे. त्याबद्दलही शिरसाट यांनी स्पष्ट शब्दांत नाराजी व्यक्त केली. ‘लाडकी बहीण योजनेसंदर्भात फेब्रुवारीमध्ये माझ्याकडे फाईल आलेली होती. तेव्हा मी त्यात स्पष्टपणे उल्लेख केलेला आहे की आपण या खात्यातून अल्पसंख्याक, दलित, या घटकांना सुविधा देतोय. त्यामुळे या खात्यांच्या निधीत कपात करु नये. माझ्या खात्यातील निधी कमी करु नये किंवा वळता करु नये, असं फाईलवर स्पष्टपणे सांगितलेलं आहे,’ असं शिरसाट यांनी म्हटलं.

लाडकी बहीणसाठी सामाजिक न्याय विभागाचा निधी वळवला जात असल्याबद्दल नाराजी बोलून दाखवणाऱ्या शिरसाटांनी अर्थ खात्यात शकुनी बसले आहेत, असं म्हणत अर्थमंत्री अजित पवारांवर अप्रत्यक्ष निशाणा साधला. ‘खात्याची गरज नसेल किंवा त्या खात्यातील पैसे खर्चच करायचे नसतील तर मग खातं बंद केलं तरी चालेल. अर्थ मंत्रालयात शकुनी बसले आहेत. या शकुनींनी हे काम केलंय,’ अशा शब्दांत शिरसाट यांनी अर्थमंत्र्‍यांना लक्ष्य केलं.

शिरसाटांनी अर्थमंत्र्‍यांवर केलेल्या टिकेला राष्ट्रवादीच्या हसन मुश्रीफ यांनी उत्तर दिलं. ‘मंत्री संजय शिरसाट हे माझे चांगले मित्र आहेत. फक्त ते नव्यानं मंत्री झालेले आहेत. ही गोष्ट जेव्हा घडली असं त्यांना वाटलं, तेव्हा त्यांनी वित्त विभागाच्या अधिकाऱ्यांची बैठक घ्यायला हवी होती. वस्तुस्थिती समजून घ्यायला हवी होती. आपल्याच एका ज्येष्ठ नेत्याला अशी उपमा देणं अतिशय अयोग्य आहे. अजितदादा हे काही आकाशातून पैसे आणणार नाही किंवा हे पैसे काही अजितदादांनी घरी नेलेले नाहीत. दर महिन्याला पैसे देताना ओढाताण होतेय हे साहजिक आहे,’ असं मुश्रीफ म्हणाले.