अलीकडेच प्रवर्तन संचालनालयाने (ईडी) नेशनल हेराल्ड प्रकरणात चार्जशीट दाखल केली आहे. या चार्जशीटमध्ये राहुल गांधी व सोनिया गांधी यांची नावे नमूद करण्यात आली आहेत. ईडीच्या म्हणण्यानुसार, या प्रकरणातून सर्वाधिक फायदा या दोन्ही नेत्यांना झाल्याचा दावा करण्यात आला आहे. या पार्श्वभूमीवर भारतीय जनता युवा मोर्चाच्या प्रदेशाध्यक्ष अमित मोरे यांच्या नेतृत्वाखाली नागपूरमध्ये आंदोलन आयोजित करण्यात आले.
आरोग्य मंत्र्यांच्या जिल्ह्यातच रुग्णवाहिका गावात पोहचू न शकल्याने महिलेचा दुर्देवी मृत्यू, ग्रामस्थांकडून संताप
हे आंदोलन महाल परिसरातील छत्रपती शिवाजी महाराज यांच्या पुतळ्यासमोर करण्यात आले. यावेळी भाजप कार्यकर्त्यांनी जोरदार घोषणाबाजी केली. “सोनिया गांधी हाय हाय”, “राहुल गांधी मुरदाबाद” अशा घोषणांनी परिसर दणाणून गेला. आंदोलन अधिक तीव्र करण्याच्या उद्देशाने कार्यकर्ते शहर काँग्रेस मुख्यालयाच्या दिशेने कूच करू लागले.

शहर काँग्रेस कार्यालय (देवडिया भवन) घेरण्याचा भाजप कार्यकर्त्यांचा प्रयत्न पोलिसांनी उधळून लावला. छत्रपती शिवाजी महाराज यांच्या पुतळ्याजवळून घोषणाबाजी करत कार्यकर्ते काँग्रेस कार्यालयाच्या दिशेने निघाले. मात्र, घटनास्थळी तैनात असलेल्या पोलीस अधिकाऱ्यांनी त्यांना अडवण्याचा प्रयत्न केला. पोलीस वारंवार विनंती करत होते की, शांतता राखावी व कायदा सुव्यवस्था भंग करू नये. तरीही कार्यकर्ते पुढे जात राहिले. अखेर, पोलिसांनी चिटणीस पार्क चौकात कार्यकर्त्यांना अडवून पुढे जाऊ दिले नाही.

या संपूर्ण प्रकारामुळे परिसरात तणावाची परिस्थिती निर्माण झाली होती. विशेषतः या ठिकाणी १७ मार्च रोजी हिंसाचार झाला होता, त्यामुळे पोलीस अधिक सतर्क होते. भाजप कार्यकर्ते देवडिया भवनच्या दिशेने जाण्याचा हट्ट धरून होते, पण पोलीसांनी त्यांना थांबवले. या कारवाईवर भाजप युवा मोर्चाने नाराजी व्यक्त केली. प्रदेशाध्यक्ष अमित मोरे यांनी पत्रकारांशी बोलताना सांगितले की, “आम्ही शांततेत आंदोलन करत होतो, परंतु पोलिसांनी आमच्यावर अन्याय केला. आम्हाला जबरदस्तीने थांबवण्यात आले. आम्ही कायदा सुव्यवस्था बिघडवू इच्छित नाही, म्हणूनच आम्ही सध्या आंदोलन स्थगित करत आहोत.” तसेच त्यांनी पुन्हा आंदोलन करण्याचा इशारा दिला आहे. “जर सरकारने आणि प्रशासनाने आमच्या मागण्यांकडे दुर्लक्ष केले, तर पुढील वेळी अधिक तीव्र आंदोलन करण्यात येईल,” असा इशारा मोरे यांनी दिला.