तरुणाने जीवनयात्रा संपवली

अंबाजोगाई शहरालगत असलेल्या रिंगरोड जवळील शेतामध्ये एका २५ वर्षीय युवकाने बाभळीच्या झाडाला गळफास घेत आपली जीवनयात्रा संपवली आहे. रामधन उर्फ करण अशोकराव नेहरकर (वय २५, रा. धावडी, ता. अंबाजोगाई) असे आत्महत्या केलेल्या युवकाचे नाव असल्याची माहिती आहे. त्याने शनिवारी (५ एप्रिल) दुपारी सुमारे तीनच्या सुमारास शहराबाहेरून जाणाऱ्या रिंगरोड लगत असलेल्या एका ढाब्याच्या मागील बाजूस असलेल्या शेतातील बाभळीच्या झाडाला गळफास घेत आयुष्याची अखेर केली. दरम्यान, त्याने इतके टोकाचे पाऊल का उचलले याबाबत अद्याप काहीही माहिती नाही. त्याने आपला जीव का दिला याचं कारण अद्याप स्पष्ट झालेलं नसून सध्या पोलीस तपास सुरू आहे.

तरुण तलावात बुडाला, अद्याप शोध सुरु

धावडी येथील चौघे मित्र केंद्रेवाडी येथील तलावात पोहण्यासाठी गेले होते. यावेळी या चार मित्रांपैकी एकजण खोल पाण्यात गेला. त्याला पाण्याचा अंदाज न आल्याने तो तलावाच्या पाण्यात बुडाला. अंकुर राजाभाऊ तरकसे (वय १८, रा. धावडी, ता. अंबाजोगाई) असं पाण्यात बुडालेल्या तरुणाचं नाव असल्याची माहिती आहे. तो पाण्यात बुडून २४ तास उलटून गेले तरी त्याचा अद्याप शोध लागलेला नाही. सध्या गावकरी त्याचा शोध घेत आहेत.

एकाच दिवसात गावातील दोन तरुणांचा अशा प्रकारे मृत्यू झाल्याने गावात एकच खळबळ माजली आहे. तर या दोन्ही तरुणांच्या कुटुंबांना यामुळे मोठा धक्का बसला आहे. तरुणा वयातील हे दोन्ही पोरं अशाप्रकारे गेल्याने गावात शोककळा पसरली आहे.