पोलिसांनी दिलेल्या माहितीनुसार, गोरेवाडा पलोटी शाळेसमोरून एक भरधाव टिप्पर जात होता. त्या टिप्परचे ब्रेक निकामी झाले. त्यामुळे टिप्पर चालकाचे वाहनावरील नियंत्रण सुटले. यात टिप्परने समोरून येणाऱ्या कारला धडक दिली. यानंतर टिप्पर रस्त्याच्या कडेला असलेल्या दुकानात घुसला. अपघातात कारचे मोठे नुकसान झाले. कारचा दरवाजा आदळल्याने कार चालकाचा जागीच मृत्यू झाला. तर टपरी चालक आणि तीन ग्राहकांसह चार जण जखमी झाले.

घटनेनंतर आरोपी टिप्पर चालक घटनास्थळावरून पळून गेला. अपघाताची माहिती मिळताच गिट्टीखदान पोलीस घटनास्थळी दाखल झाले. या अपघातात टपरी चालक गंभीर जखमी झाले असून त्यांची प्रकृती चिंताजनक असल्याचे सांगण्यात येत आहे. कार टिप्परला धडकली. त्यामुळे कारचालक गंभीर जखमी होऊन त्याचा जागीच मृत्यू झाला. चारही जखमींवर खासगी रुग्णालयात उपचार सुरू आहेत. तर अजुनही मृताची ओळख पटलेली नाही.

मृत तरुणाचा मृतदेह बाहेर काढण्यासाठी पोलिसांना क्रेन बोलवावी लागली. हा अपघात किती भीषण होता, यावरून समजू शकतो. तक्रारीच्या आधारे पोलिसांनी आरोपी टिप्परचालकाविरुद्ध गुन्हा दाखल केला आहे. यावेळी घटनास्थळी मोठा जमाव जमला होता. त्यामुळे अपघातग्रस्तांना मदत करण्यात पोलिसांना अडथळा निर्माण झाला. त्यामुळे जमावाला पांगवण्यासाठी पोलिसांनी आक्रमक पवित्रा घेतला. पोलीस आरोपी टिप्पर चालकाचा शोध घेत आहेत.