२६ मार्चला राकेश आणि गौरी यांच्यात वाद झाला होता. राकेशच्या कामामुळे दोघे बंगळुरुला स्थायिक झाले. पण तिथे गेल्यावर गौरीला नोकरी मिळत नव्हती. त्यामुळे त्यांच्यात खटके उडत होते. राकेशसोबत बंगळुरुला आल्यामुळेच आपल्याला नोकरीशिवाय घरात बसून राहावं लागत असल्याची भावना गौरीच्या मनात होती. याच कारणावरुन दोघांचा वाद झाला. वाद टोकाला गेला आणि राकेशनं गौरीची हत्या केली.

गौरीची हत्या केल्यानंतर राकेश साताऱ्याच्या दिशेनं कार घेऊन गेला. तेव्हा त्यानं त्याच्याच इमारतीत तळमजल्यावर राहणाऱ्या प्रभू सिंह यांना फोन केला. गौरीनं जीव देण्याचा प्रयत्न केल्याचं त्यानं सिंह यांना सांगितलं. गौरीनं गळफास घेऊन आयुष्य संपवण्याचा प्रयत्न केला. याची माहिती तुम्ही पोलीस आणि घरमालकांना द्या, अशी सूचना राकेशनं प्रभू सिंह यांना दिली. यानंतर प्रभू सिंह यांनी लगेचच राकेशच्या घरमालकाला फोन केला. घडला प्रकार सांगितला. त्यांनी तातडीनं पोलिसांशी संपर्क साधला आणि घडलेला प्रकार कथन केला. यानंतर पोलिसांनी घटनास्थळ गाठलं. गौरीच्या मृतदेहाची अवस्था पाहता तिनं आत्महत्या केली नसून तिची हत्याच झाल्याचं पोलिसांच्या लक्षात आलं.

राकेश खेडकर हिताची सिस्टिम्स इंडिया कंपनीत वरिष्ठ प्रकल्प समन्वयक म्हणून कार्यरत आहेत. तो घरातूनच काम करतो. तर गौरीनं बंगळुरुला जाण्यासाठी नोकरी सोडली होती. बंगळुरुत गेल्यानंतर गौरीनं तिच्यासाठी काम शोधण्याचा प्रयत्न केला. पण तिला मनासारखी नोकरी मिळाली नाही. राकेशनं पोलिसांना दिलेल्या जबाबानुसार, गौरी त्याच्याकडे सतत मुंबईला परत जाण्याचा हट्ट करत होती. त्यावरुन दोघांमध्ये सतत खटके उडत होते. Gauri Khedekar Murder : अगं गौरी, आपण नाही जाऊ शकत मुंबईला परत; बायकोने भांडी फेकली, राकेशला संताप अनावर, ‘त्या’ रात्री काय घडलं?
गौरी आणि राकेश यांचा प्रेम विवाह झालेला होता. गौरी ही राकेशच्या आत्याची मुलगी आहे. दोघांच्या कुटुंबियांचा लग्नाला विरोध होता. गौरी आणि राकेश यांचे स्वभाव पाहता त्यांचं पुढे जाऊन पटणार नाही, असं त्यांच्या कुटुंबियांना वाटत होतं. त्यामुळे त्यांनी लग्नाला विरोध दर्शवला. पण कुटुंबियांच्या विरोधाला न जुमानता दोघांनी लग्न केलं होतं.