उपमुख्यमंत्री एकनाथ शिंदे हे 31 मार्चला नंदुरबार जिल्हा दौऱ्यावर जाणार आहेत. तत्पूर्वी उद्धव ठाकरे यांच्या शिवसेनेचे जिल्हाप्रमुख असलेले, जिल्हा परिषदेचे माजी शिक्षण सभापती गणेश पराडके यांनी उद्धव ठाकरे यांची साथ सोडली. त्यामुळे उद्धव ठाकरेंना नंदुरबारमध्ये मोठा धक्का बसला आहे. शिवसेनेचे मुख्य नेते तथा उपमुख्यमंत्री एकनाथ शिंदे यांच्या आदेशाने तसेच खासदार श्रीकांत शिंदे यांच्या सूचनेनुसार बुधवारी मुंबई येथील शिवसेना मध्यवर्ती कार्यालयातून सचिव भाऊसाहेब चौधरी यांनी प्रसिद्धी पत्रकाच्या माध्यमातून कार्यकारिणी जाहीर केली. यानंतर गणेश पराडके यांची शिंदे शिवसेनेच्या जिल्हाप्रमुख पदी निवड करण्यात आली आहे.

एकनाथ शिंदे शिवसेनेपासून वेगळे झाल्यानंतर आमदार आमश्या पाडवी आणि गणेश पराडके हे उद्धव ठाकरे यांच्यासोबत राहिले होते. त्यानंतर आमदार आमश्या पाडवी हे एकनाथ शिंदे यांच्यासोबत गेले. मात्र गणेश पराडके उद्धव ठाकरे यांच्यासोबत होते. चंद्रकांत रघुवंशी यांची आमदारकीपदी नियुक्ती झाल्यानंतर आभार सभेच्या दिवशी गणेश पराडके हे अचानक शिवसेनेच्या मंचावर दिसले. त्यानंतर त्यांची जिल्हाप्रमुखपदी निवड करण्यात आली.

गणेश पराडके यांची मोठी ताकद

धडगाव येथील गणेश पराडके हे जिल्हा परिषदेचे माजी शिक्षण सभापती आहेत. ते धडगाव तालुक्यातील तोरणमाळ गटातून जिल्हा परिषद सदस्य म्हणून निवडून गेले होते. त्यांनी के. सी. पाडवी हे राज्याचे आदिवासी विकास मंत्री असताना त्यांच्या पत्नीचा पराभव केला होता. तोरण माळगटासह गणेश पराडके यांची विविध गटांमध्ये मोठी ताकद आहे. त्यांच्या शिंदेंच्या शिवसेनेत प्रवेशानंतर शिवसेनेला आगामी स्थानिक स्वराज्य संस्थांच्या निवडणुकीत मोठा फायदा होणार आहे. विधानसभा निवडणुकीतही त्यांच्या मदतीमुळे आमश्या पाडवी यांना आमदारकीसाठी मोठी मदत झाली होती.