याबाबत मिळालेल्या अधिक माहितीनुसार, बुलढाणा जिल्ह्यातील साखरखेर्डा शेंदुर्जन येथील एका युवकाचा रिसोड जवळ भीषण अपघात झाला. या अपघातात गंभीर जखमी झाल्याने त्याचा मृत्यू झाला आहे. हा अपघात २२ मार्च रोजी झाला असून मृतकाचे नाव माधव दिगंबर नालेगावकर असल्याची माहिती समोर आली आहे. शेंदुर्जन येथील माधव दिगंबर नालेगावकर हा २२ वर्षीय युवक रिसोड येथे आपल्या एका नातेवाईकाच्या लग्न समारंभात केला होता. तो त्याच्या दुचाकीने लग्न समारंभाच्या ठिकाणी आला होता. लग्नसमारंभात आनंद साजरा केल्यानंतर तो घरी येण्यासाठी निघाला होता.

आपल्या दुचाकीने परत येत असताना विठ्ठल आळसा फाट्यावर समोरासमोर मोटरसायकल आणि एक चार चाकी वाहनाची जबर धडक झाली. ही धडक इतकी भीषण होती की यात दुचाकीचा चक्काचूर झाला. या धडकेत दुचाकीस्वार माधव नालेगावकर (वय वर्ष २२) हा गंभीर जखमी झाला होता. त्याला तातडीने अकोला येथे रेफर करण्यात आले. परंतु, अकोला येथील डॉक्टरांनी त्याला मृत घोषित केले. २२ मार्च रोजी शेंदूरच्या येथे रात्री शोकाकुल वातावरणात त्याच्यावर अंतिम संस्कार करण्यात आले. त्याच्या मागे आई, पत्नी, एक मुलगा आणि भाऊ असा परिवार आहे. या घटनेने त्याच्या कुटुंबीयांवर दु:खाचा डोंगर कोसळला आहे.

लग्न समारंभामध्ये तो सहभागी होण्याकरता गेला होता. जेव्हा त्या लोकांना याची माहिती मिळाली तेव्हा सर्वांना एकच धक्का बसला. काही वेळापूर्वी जी व्यक्ती लग्न समारंभामध्ये आनंदाने सहभागी झाला होता. त्याचा अचानक मृत्यू झाला यावर कोणाचाच विश्वास बसत नव्हता. माधव अपघातात कायमचा गेला हे कळलं तेव्हा सर्वांना एकच धक्का बसला.