सुशांत सिंह राजपूतचा १४ जून २०२० ला संशयास्पद मृत्यू झाला होता. त्यावेळी तो ३४ वर्षांचा होता. त्याच्या राहत्या घरी त्याचा मृतदेह आढळल्याने एकच खळबळ उडाली होती. याप्रकरणाची गंभीरता लक्षात घेता तत्कालीन सरकार प्रकरणाचा तपास सीबीआयकडे सोपवला होता. यानंतर सुशांतच्या पोस्टमॉर्टम रिपोर्टमध्ये त्याचा मृत्यू श्वास कोंडल्याने झाला असल्याचे नमूद करण्यात आले होते.

सीबीआयचं क्लोजर रिपोर्ट काय सांगतं?

सुशांत सिंग राजपूत प्रकरणात मोठ्या चौकशीअंती पाच वर्षांनंतर सीबीआयने आता न्यायालयात क्लोजर रिपोर्ट दाखल केला आहे. अधिकाऱ्यांच्या म्हणणे आहे की, दोन प्रकरणांत क्लोजर रिपोर्ट दाखल करण्यात आले आहेत. एक अभिनेत्याच्या वडिलांनी रिया चक्रवर्तीवर केलेल्या आरोपांबद्दल आहे आणि दुसरे रियाने अभिनेत्याच्या कुटुंबावर केलेल्या आरोपांबद्दल आहे. ऑगस्ट २०२० मध्ये, सीबीआयने बिहार पोलिसांकडून हे प्रकरण ताब्यात घेतले. सूत्रांच्या माहितीनुसार, चार वर्षांहून अधिक काळ लोटल्यानंतरही, सीबीआयला अभिनेत्याला आत्महत्या करण्यास भाग पाडल्याचा कोणताही ठोस पुरावा मिळाला नाही. त्यामुळे सीबीआयने हा क्लोजर रिपोर्च दाखल केला आणि अभिनेत्री रिया आणि तिच्या कुटुंबाला क्लीनचिट दिली आहे.

मध्यंतरी फॉरेन्सिक टीमनेही सुशांतची हत्या नसून ती आत्महत्या असल्याचे सांगितले होते. मृत्यूनंतर सुशांतचे वडील के. के. सिंग यांनी पाटणा येथे तक्रार दाखल केली होती. त्याआधारे पोलिसांनी सुशांतला आत्महत्या प्रवृत्त केले असल्याचा गुन्हा नोंदवला. रिया चक्रवर्तीनेच सुशांतचा मानसिक छळ केला, त्याच्याकडे पैशांची मागणी केली. म्हणून त्याने आत्महत्या केली असल्याचा दावा सुशांतच्या कुटुंबीयांनी केला होता.

एम्सच्या फॉरेन्सिक तज्ज्ञांनी सुशांतच्या मृत्यूप्रकरणी विषबाधा आणि गळा आवळून हत्या केल्याची शक्यता नाकारली आहे. त्याआधारे सीबीआयने हा रिपोर्ट सादर करुन प्रकरण बंद केले आहे. आता सीबीआयच्या रिपोर्टवर न्यायालय काय निर्णय घेणार, हे पाहणे महत्वाचे ठरणार आहे.