Buldhana Crime News : मोताळा तालुक्यातील जयपूर येथील राजेंद्र राठी यांच्या शेतातील फार्म हाऊसवर २० मार्चच्या रात्री काही लोक तांत्रिकासह अघोरी पूजा करण्यासाठी एकत्रित जमणार असल्याची गोपनीय माहिती बोराखेडी पोलीस निरीक्षक सारंग नवलकार यांना मिळाली होती. त्यांनी आपल्या कर्मचाऱ्यांसह घटनास्थळी धाड टाकली.
अमोल सराफ, बुलढाणा : फार कमी कष्ट करत झटपट श्रीमंत होण्याचा विचार आजकाल प्रत्येक व्यक्ती दिवस रात्र करत असते. मात्र एखाद्या मोहाच्या आहारी जात, त्याकरिता करण्यात येणारा अघोरी प्रयत्न माणसाला अडचणीत आणतो. असाच काहीसा प्रकार बुलढाण्यातून समोर आला आहे. २० मार्च रोजी, पैशांचा पाऊस पाडण्यासाठी, मोताळा तालुक्यातील जयपूर शिवारात रात्री अकरा वाजण्याच्या सुमारास एका फार्म हाऊसवर पंधरा वर्षांच्या अल्पवयीन मुलीला घेऊन अघोरी पूजा करण्याचा प्रकार सुरू होता. मात्र बोराखडी पोलिसांनी प्रकाराचा पर्दाफाश करीत या प्रकरणी नऊ जणांना बेड्या ठोकल्या आहेत. व जवळपास साडेचार लाख रुपयांचा मुद्देमाल जप्त केला आहे.
मोताळा तालुक्यातील जयपूर येथील राजेंद्र राठी यांच्या शेतातील फार्म हाऊसवर २० मार्चच्या रात्री काही लोक तांत्रिकासह अघोरी पूजा करण्यासाठी एकत्रित जमणार असल्याची गोपनीय माहिती बोराखेडी पोलीस निरीक्षक सारंग नवलकार यांना मिळाली होती. त्यांनी आपल्या कर्मचाऱ्यांसह घटनास्थळी धाड टाकली. तांत्रिक गणेश समाधान गोरे राहणार उज्जैन मध्य प्रदेश हा पूजेचे साहित्य जमवून एका पंधरा वर्षे अल्पवयीन मुलीकडून पैशाचा पाऊस पाडण्यासाठी विधी करणार होता. तो जादूटोणा विधीची पूजा करण्यासाठी तेथे लिंबू नारळ ,पिवळी ,खारीक, हळद कुंड, बिबेराळ, हिरवी डाळ, रुद्राक्ष, धोतर अशा विविध साहित्याची पूजा मांडून गुप्तधनासाठी अघोरी कृत्य करीत असल्याचे दिसून आले.
याप्रकरणी पोलिसांनी नऊ जणांना ताब्यात घेतले. यामध्ये सात पुरुष व दोन महिलांचा समावेश आहे . बोराखडी पोलीसांनी याबाबत कलम तीन दोन महाराष्ट्र नरबळी व अघोरी प्रथेचे समुच्चाटन करणे अधिनियम २०१३ अन्वये गुन्हा दाखल केला. दिनांक २१ मार्च रोजी मोताळा न्यायालयात आरोपींना हजर केले असता न्यायालयाने त्यांना तीन दिवसाची पोलीस कोठडी सुनावली. सदर कारवाई बोराखडी पोलीस निरीक्षक सारंग नवलकर यांच्या मार्गदर्शनाखाली एपीआय बालाजी शेंगपल्लू, पी आय राजेंद्र कपले, नायब पोलीस कॉन्स्टेबल प्रवीण पडवळ ,सुनील आवटे मनोहर पंडित ,नंदकिशोर धंदे यांच्या पथकाने यशस्वीरित्या पार पाडली.
गणेश समाधान मोरे वय वर्ष ३२ ,राजेंद्र विठ्ठलदास राठी वय वर्ष ६०, नितीन विठ्ठल गायकवाड वय वर्ष २८, दीपक सुधाकर सुपे वय वर्ष ४८, अमर रमेश पिंजरकर वय वर्ष ४५, रत्नदीप पाटील वय वर्ष ४५ ,सुधाकर मुधोळकर वय वर्ष ५०, निलेश आखाडे वय वर्ष २५ कोमल रमेश गायकवाड वय वर्ष २७ यांना ताब्यात घेतले.