शिवजयंती सोहळ्यांच्या अनुषंगाने शिवनेरीवर होणारी शिवभक्तांची गर्दी, त्यातून काहींचे अनिर्बंध वावरणे, कॅमेरा मोबाइलचे फ्लॅश वापरणे, त्यातच पर्यटकांचा नकळत होणारा गोंगाट काही नतद्रष्टांकडून मधमाश्यांच्या पोळ्याला दगड मारून उपद्रव करण्याची विकृती या कारणांसह शिवज्योतींचा निघणारा धूर ही कारणे मधमाश्यांना त्रासदायक ठरत असल्याने त्यांचे हल्ले होत असल्याचे जाणकारांचे म्हणणे आहे.

खबरदाची हाच उपाय

पोळ्यांच्या परिसरात धूर होणार नाही, लाल किंवा भडक रंगाचे कपडे नसावे, गोंगाट करू नये, अत्तर, डिओड्रंट, सुवासिक तेलाचा वापर करू नये. पुरेशी काळजी, खबरदारी घेऊन ट्रेक करावेत, असे आवाहन कृषी कीटकशास्त्रज्ञ प्रा. हेमंतकुमार डुंबरे यांनी दिली.

मधमाशांचा हल्ला

काही खोडसाळ युवकांना दगड मारून मधमाश्यांचे पोळे उठवल्याने चवताळलेल्या माश्यांनी शिवनेरी गडावर आलेल्या पर्यटकांवर हल्ला चढविला. त्यात ४७ जण जखमी झाले. आज, सोमवारी तिथीने शिवजयंती असल्याने शिवभक्तांची गर्दी शिवनेरीवर होती. अनेकांनी आणलेल्या मशालींच्या धुरामुळेही माश्या बिथरल्या. सकाळी नऊच्या सुमारास शिवाई देवी मंदिराकडे जाणाऱ्या मार्गावर ही घटना घडली. घटनेनंतर बचावासाठी धावपळ उडाली.

वन विभाग, पुरातत्त्व विभागाचे कर्मचारी, जुन्नर रेस्क्यू टीमचे सदस्य यांनी ही घटना समजताच गडावर धाव घेऊन जखमींना खाली आणले. तोपर्यंत सरकारी रुग्णवाहिकांसह तीन खासगी रुग्णवाहिका गडावर दाखल झाल्या. त्यातून जखमींना जुन्नरच्या छत्रपती शिवाजी ग्रामीण रुग्णालयात दाखल करण्यात आले. तेथे वैद्यकीय अधिकारी डॉ. जाहीद हसन यांनी जखमींवर उपचार केले. जुन्नर परिसरात शिवभक्त आणि पर्यटकांवर मधमाश्यांचा झालेला हा चौथा हल्ला आहे. गत वर्षी १८ फेब्रुवारीला हिंदवी स्वराज्य महोत्सव सुरू असताना तुळजा लेणी येथे मधमाश्यांनी पर्यटकांवर हल्ला केला होता. त्यात ८४ जण जखमी झाले होते.