येरवडा पोलीस स्टेशन पासून हाकेच्या अंतरावर असणाऱ्या शास्त्री चौकात आज (8 मार्च ) सकाळी सुमारे साडेसात वाजता ही घटना घडली. सकाळी ही घटना घडली त्यानंतर समाज माध्यमांवर गौरव आहुजाचे अश्लील कृत्य व्हायरल झाले आणि त्यानंतर जागे झालेल्या पुणे पोलिसांनी दुपारनंतर चौकशीचे सूत्र फिरवायला सुरुवात केली. गुन्हेगारी पार्श्वभूमी असलेल्या गौरव आहुजाच्या बापाला म्हणजेच मनोज आहुजाला पोलिसांनी ताब्यात घेऊन चौकशी केली. पण मनोज अहुजा याने आपला मुलगा रात्री पार्टी करण्यासाठी गेला होता. त्याचा फोन आता बंद आहे, तो कुठे आहे याची आम्हाला कल्पना नसल्याचं पोलिसांना सांगितलं. मात्र त्यानंतर देखील पुणे पोलिसांना गौरव आहुजाचा ठाव-ठिकाणा लागला नाही.
जुगार, मटका अन् बरंच काही; पुण्यात कारमध्ये अश्लील चाळे करणाऱ्या गौरव अहुजाची कुंडली समोर
अखेर रात्री नऊच्या सुमारास गौरव आहुजा याने एक व्हिडिओ सादर करत आपल्याकडून चुकी झाल्याची कबुली दिली आणि पुणे पोलीस, पुणेकर नागरिक इतकच नाही तर शिंदे साहेबांची सुद्धा माफी मागितली. हा गौरव आहुजा एखाद्या सराईत गुन्हेगाराप्रमाणे व्हिडिओ सादर करून माफी मागतो आणि पुढील आठ तासात आपण येरवडा पोलीस स्टेशनमध्ये सरेंडर होणार असल्याचं सांगतो. व्हिडिओ सादर करून सरेंडर होणे हे महाराष्ट्रासाठी आता काही नवीन नाही. संतोष देशमुख यांच्या हत्याकांडातील आरोपी वाल्मीक कराड याने सुद्धा असाच व्हिडिओ करून आपण सरेंडर होणार असल्याची माहिती दिली होती. आता याच प्रमाणे गौरव आहुजाने सुद्धा व्हिडिओ सादर करून आपण सरेंडर होणार असल्याचं सांगितलं आहे.

आधी वाल्मीक कराड आणि आता गौरव आहुजा यांच्या या व्हिडिओ सादर करून सरेंडर होण्याच्या पॅटर्नमुळे पोलिसांची मोठी नाचक्की झाली आहे. राज्यात कायदा आणि सुव्यवस्था आहे की नाही असा प्रश्न आता सामान्य जनतेला पडायला सुरुवात झाली आहे. राजरोसपणे उठून कुणीही गुंड मनाला वाटेल ते कृत्य करणार आणि त्याची उपरती झाल्यावर व्हिडिओ सादर करून आपण सरेंडर होणार असल्याचं सांगत थाटात पोलीस स्टेशनमध्ये हजर होणार या पॅटर्नमुळे पोलिसांची प्रतिमा कमालीची डागळली आहे हे मात्र नक्की.