पुण्यातील बलात्काराच्या प्रकरणामुळे राज्यभरात संताप्त व्यक्त केला जात असताना पुण्यात कॅबमध्ये आयटी कंपनीच्या महिलेला धक्कादायक अनुभव आला आहे. पोलिसात जात या प्रकरणाची तक्रार त्या महिलेने केली आहे.
धावत्या कारमध्ये चालकाचे नको ते कृत्य
खडकी पोलिसांनी दिलेल्या माहितीनुसार, एका आयटी कंपनीत कार्यरत असलेल्या ४१ वर्षीय महिला अभियंता (टेक्नोलॉजी प्रोफेशनल) यांनी तक्रार दाखल केली आहे. पीडित महिलेने एका प्रसिद्ध ॲग्रीगेटर ॲपद्वारे कॅब बुक केली. कल्याणीनगर येथील आपल्या कार्यालयातून सायंकाळी साडेसातच्या सुमारास पिंपळे सौदागर येथे घरी जाण्यासाठी त्या निघाल्या होत्या.
गाडी शहदवाल बाबा चौकात पोहोचली आणि संगमवाडी रोडमार्गे पाटील इस्टेट चौकाच्या दिशेने जाऊ लागली. तेव्हा चालकाने आरसा महिलेचा चेहरा दिसेल असा सेट केला. यानंतर तो आरशात महिलेला पाहून धावत्या कारमध्ये चालक अश्लिल कृत्य करू लागला. यामुळे पिडीत महिला घाबरली. गाडी सिग्नलपाशी थांबताच तिने दरवाजा उघडून बाहेर पळ काढला. यानंतर महिलेने २ किलोमीटर धावत जात थेट खडकी पोलीस ठाणे गाठले.
पोलिसांनी आरोपीबद्दल दिलेली माहितीदरम्यान कॅब चालकाने पुढे जाऊन महामार्गावर गाडी एका बाजूला थांबवली आणि तेथून पळ काढला. पोलिसांनी महिलेकडून कॅब बुकिंगचा तपशील आणि वाहन क्रमांक घेतला. त्याआधारे कॅब मालकाचा शोध लागल्यावर चालकाला अटक करण्यात आली. आरोपी मूळचा उत्तर प्रदेशातील असून काही दिवसांपूर्वीच पिंपरी-चिंचवड येथे स्थलांतरीत झाला आहे. याप्रकरणी गुन्हा दाखल केल्याची माहिती सहायक पोलीस निरीक्षक चोरमोले यांनी दिली.