कोथरूड परिसरातील भेलकेनगर येथे मारणे टोळीतील काही सराईतांनी देवेंद्र जोग नावाच्या तरुणाला बेदम मारहाण केली होती. त्याची गंभीर दखल घेऊन पुणे पोलिसांनी गजानन मारणे याच्यासह रूपेश मारणे, ओम तीर्थराम धर्मजिज्ञासू, किरण कोंडिबा पडवळ, अमोल विनायक तापकीर (सर्व रा. शास्त्रीनगर, कोथरूड) आणि बाब्या उर्फ श्रीकांत संभाजी पवार (रा. वडगाव रासाई, शिरूर) या सहा जणांवर महाराष्ट्र संघटित गुन्हेगारी कायद्यानुसार (मकोका) कारवाई केली. त्यानंतर गजानन मारणे स्वतःहून पोलिसांसमोर हजर झाला, तर रूपेश मारणे आणि बाब्या पवार अद्याप फरारी असून, पोलिस त्यांचा शोध घेत आहेत.

न्यायाधीशांनी आरोपी गजानन मारणेला पूर्ण नाव आणि पोलिसांबद्दल काही तक्रार आहे का, अशी विचारणा केली. त्यावर पोलिसांबद्दल कोणतीही तक्रार नाही; परंतु माझी दाढ खूप दुखत असून, त्यावर उपचार करण्यास पोलिसांना सांगण्याची विनंती गजानन मारणेने केली. त्यावर आरोपीची पूर्ण काळजी घेण्याची जबाबदारी पोलिसांची आहे, अशी सूचना न्यायाधीश व्ही. आर. कचरे यांनी पोलिसांना केली.

संघटित गुन्हेगारांची दहशत

या प्रकरणाचा संपूर्ण तपास गुन्हे शाखेकडे वर्ग करण्यात आला आहे. त्यानुसार, विशेष न्यायाधीश व्ही. आर. कचरे यांच्या न्यायालयात मंगळवारी दुपारी गजानन मारणेला गुन्हे शाखेने हजर केले. गजानन मारणे हा सराईत गुन्हेगार असून, त्यानेच साथीदारांना तक्रारदार तरुणाला भर चौकात जिवे मारण्यासाठी चिथावणी दिली. त्याच्या साथीदारांचा पोलिस शोध घेत असून, त्यांच्या ठावठिकाण्याबाबत तो उडवाउडवीची उत्तरे देत आहे. त्याच्या मोबाइलचे तांत्रिक विश्लेषण सुरू असून, घटनास्थळावरचे सीसीटीव्ही चित्रीकरण पडताळून इतर साथीदार असल्यास त्यांची नावे निष्पन्न करायची आहेत. आरोपी संघटित गुन्हेगारी करणाऱ्या टोळीचा म्होरक्या असून, इतर आरोपी सदस्य आहेत. त्यांच्यावर विविध गंभीर गुन्हे दाखल असून, लोकांच्या मनात प्रचंड दहशत आहे. त्यांनी अशा प्रकारे संघटित गुन्हेगारी करून बेकायदा मालमत्ता जमवली आहे का, याबाबत तपास करायचा आहे. त्यासाठी आरोपीला पोलिस कोठडी देण्याची मागणी विशेष सरकारी वकील विलास पठारे व सहायक आयुक्त गणेश इंगळे यांनी केली.

मानवाधिकारांचे उल्लंघन

आरोपी गजानन मारणेला मधुमेहाचा आणि हृदयविकाराचा त्रास आहे. गुन्हा दाखल झाल्यावर तो स्वतःहून हजर झाला असतानाही त्याला फरशीवर बसवून नकळत छायाचित्र काढून व्हायरल करण्याचे बालिश प्रकार सुरू आहेत. न्यायालयातही त्याला व्हरांड्यात खाली बसायला सांगून अपमानित केले जात आहे. त्याला औषधोपचार नाकारले जातात. हे अटक आरोपीच्या मूलभूत मानवाधिकाराचे उल्लंघन आहे, अशी तक्रार वकील ॲड. विजयसिंह ठोंबरे यांनी न्यायालयात केली; तसेच याबाबत उच्च न्यायालयात दाद मागणार असल्याचे सांगितले. पोलिस यंत्रणेने द्वेष आणि दबावापोटी आरोपीला खोट्या गुन्ह्यात गोवले असून, किरकोळ मारहाणीच्या गुन्ह्यात जिवे मारण्याचे व ‘मकोका’चे कलम लावले आहे. आरोपीने चिथावणी दिल्याचा उल्लेख तक्रारदाराच्या जबाबात नाही. सीसीटीव्ही चित्रीकरणातही आरोपी दिसत नाही, असा युक्तिवाद ॲड. विजयसिंह ठोंबरे यांनी केला.