मोनिका या छत्रपती संभाजीनगर महापालिकेच्या आयुष्यमान भारत या रुग्णालयात परिचारिका म्हणून काम करत होत्या. त्या जालना येथे राहत होत्या. त्या दररोज कामानिमित्त संभाजीनगर येथे ये-जा करायच्या. त्यासाठी त्या रेल्वे स्थानकापर्यंत दुचाकीने यायच्या. रेल्वे स्थानकाबाहेरील पार्किंगमध्ये त्या आपली गाडी पार्क करायच्या. यादरम्यान त्या पार्किंगमध्ये काम करणाऱ्या इरफान शेखसोबत त्यांची ओळख झाली आणि त्याचं रुपांतर प्रेमात झालं. गेल्या वर्षभरापासून यांचं प्रेमप्रकरण सुरु होतं. हे दोघे तासनतास फोनवर बोलायचे, अशी माहिती आहे.

६ फेब्रुवारीला मोनिका या नेहमीप्रमाणे संभाजीनगर येथे कामावर जाण्यासाठी घरातून निघाल्या होत्या. पण, रात्री त्या घरी परतल्याच नाहीत. त्यामुळे मोनिका यांच्या आईने पोलिसांत धाव घेतली आणि त्या बेपत्ता असल्याची तक्रार दाखल केली. तब्बल १० दिवस मोनिका यांचा शोध सुरु होता.

यादरम्यान, पोलिसांना इरफान शेख याच्यावर संशय आला. पोलिसांनी चौकशीसाठी त्याला ताब्यात घेतलं. जेव्हा पोलिसांनी त्याची कसून चौकशी केली तेव्हा त्याने या हत्येची कबुली दिली. आरोपी शेखने मोनिका यांना लासूर येथील आपल्या शेतात नेलं आणि तिथेच त्यांची हत्या केली. त्यानंतर त्याने शेतातील एका पडक्या खोलीत विवस्त्र करुन मोनिकाचा मृतदेह पुरला.

पोलिसांच्या तपासात शेखने मोनिकाच्या हत्येची कबुली दिली. तसेच, तिची हत्या करुन तिला कुठे पुरलं हेही सांगितलं. त्यानंतर पोलिसांनी घटनास्थळ गाठून मोनिका यांचा मृतदेह ताब्यात घेतला. सध्या पोलीस या प्रकरणाचा तपास करत आहेत.