संतोष देशमुख यांच्या हत्येनंतर बीडमधील गुन्हेगारीचं भीषण वास्तव्य समोर आलं. बीडमध्ये किती भयानकप्रकारे गुन्हेगारी फोफावली आहे याची चर्चा पुन्हा होऊ लागली. या प्रकरणी वाळू माफिया, राख माफिया यांबाबत पुन्हा चर्चा होऊ लागली. बीडच्या पोलीस अधिक्षकपदी एका डॅशिंग आयपीएस अधिकाऱ्याला नियुक्त करण्यात आलं. बीडचे सध्याचे पोलीस आयुक्त नवनीत कॉवत यांच्याकडून जिल्ह्यातील गुन्हेगारीवर अतिशय योग्य आणि कठोर पावलं उचलली जाताना दिसत आहेत. दुसरीकडे संतोष देशमुख यांच्या हत्या प्रकरणावरुन राजकारण तापलेलं आहे.

दुसरीकडे संतोष देशमुख यांची मुलगी वैभवी देशमुख ही आपल्या पित्याला न्याय मिळावा यासाठी लढा देत आहे. ती खूप संयमाने परिस्थितीला सामोरे जात आहे. आपल्या पित्याला न्याय मिळावा यासाठी काढण्यात आलेल्या प्रत्येक मोर्चात ती सहभागी झाली. पित्याच्या निधनामुळे ती आतून खचली आहे. पण तिने धीर सोडलेला नाही. आपल्या पित्याच्या मारेकऱ्यांना फाशीची शिक्षा देण्यात यावी, अशी तिची मागणी आहे. या मागणीसाठी तिने मुख्यमंत्री देवेंद्र फडणवीस यांचीदेखील भेट घेतली. यानंतर ती आज आणखी एका परिक्षेला सामोरं जात आहे.
‘शरद पवारांची गुगली अनेकांना कळत नाही, पण मला अजून गुगली टाकली नाही’, पवारांसमोर शिंदे काय म्हणाले?

‘प्रत्येक पावलाला माझ्या वडिलांची आठवण येते’

वैभवी ही सध्या बारावी इयत्तेत शिक्षण घेत आहे. तिची यंदा बारावी बोर्डाची परीक्षा आहे. तिने आज बारावी बोर्डाचा पहिला पेपर दिला. या पेपरनंतर तिने माध्यमांना प्रतिक्रिया दिली. “मी माझ्या परीने जेवढा सोडवू शकेल तेवढा आजचा पेपर सोडवला. पण हा माझा पहिलाच पेपर होता ज्यावेळेस माझे वडील माझ्यासोबत नव्हते. ते आज आमच्यात नाहीत ही खूप दु:खाची गोष्ट आहे. आम्ही यातून सावरु शकलेलो नाहीत. माझे बाबा आज आमच्यात नाहीत हे माझं दुर्भाग्य समजते. परीक्षाच काय प्रत्येक पावलाला मला माझ्या वडिलांची आठवण येते. वडील आमच्यात असते तर आम्ही आज इतके कधीच खचून गेलो नसतो. हा संघर्ष आम्हाला कधीच करावा लागला नसता”, असं सांगत असतानाच वैभवीला हुंदका दाटून आला. तिला रडू कोसळलं. तिचं हे रडणं काळीज पिळवटून टाकणारं आहे. संतोष देशमुख यांचे सर्व कुटुंबिय त्यांना न्याय मिळावा यासाठी लढत आहेत. या प्रकरणी त्यांना खरंच न्याय मिळतो का ते पाहणं महत्त्वाचं आहे.