कळंबोली सर्कल येथे नव्याने उड्डाणपूल व भुयारी मार्गाचे काम हाती घेण्यात येणार आहे. या दरम्यान वाहतूककोंडी होण्याची शक्यता लक्षात घेऊन, नवी मुंबई वाहतूक विभागाने मुंबई-पुणे द्रुतगती मार्गावरील मुंबई वाहिनीवर ‘किमी १.२०० पनवेल एग्झिट’ हा मार्ग मंगळवार, ११ फेब्रुवारीपासून पुढील सहा महिने बंद ठेवण्याचा निर्णय घेतला आहे. याबाबतची अधिसूचना नवी मुंबई वाहतूक विभागाचे पोलिस उपायुक्त तिरुपती काकडे यांनी जाहीर केली. त्यानुसार पनवेल एग्झिट येथून कळंबोली सर्कलवरून पनवेल, मुंब्रा तसेच जेएनपीटीकडे जाणाऱ्या सर्व प्रकारच्या (हलकी व जड-अवजड वाहने) वाहनांसाठी पर्यायी मार्ग निश्चित करण्यात आला आहे.

‘महाराष्ट्र राज्य पायाभूत सुविधा विकास महामंडळातर्फे कळंबोली जंक्शनच्या सुधारणा करण्याचे काम पूर्ण होईपर्यंत ही वाहतूक अधिसूचना लागू राहणार आहे. नागरिकांनी या कालावधीत वाहतुकीसाठी पर्यायी मार्गांचा वापर करावा,’ असे आवाहन नवी मुंबई वाहतूक विभागाचे पोलिस उपायुक्त तिरुपती काकडे यांनी केले.

वाहतुकीसाठी पर्यायी मार्ग

मुंबई-पुणे द्रुतगती महामार्गावरून पनवेल, गोवा, जेएनपीटीकडे जाणाऱ्या सर्व प्रकारच्या वाहनांना कोनफाटा (किमी ९.६००) येथे डावीकडे वळण घेऊन एनएच ४८ मार्गावरून पळस्पे सर्कल येथून इच्छितस्थळी जाता येणार आहे. तसेच मुंबई-पुणे द्रुतगती महामार्गावरून (पनेवल एग्झिट) येथून तळोजा, कल्याण – शिळफाट्याकडे जाणाऱ्या सर्व प्रकारच्या वाहनांना सरळ पनवेल-शीव महामार्गावरून पुरुषार्थ पेट्रोलपंप उड्डाणपुलाखालून उजवीकडे वळण घेऊन रोडपाली येथून एनएच ४८ महामार्गावरून इच्छितस्थळी जाता येणार आहे.