पंचांच्या निर्णयावर काका पवार काय म्हणाले?

‘कालची कुस्ती चितपट झालीच नाही. दोन्ही खांदे जमिनीला टेकले असते, तरच कुस्ती चितपट ठरली असती. मात्र, येथे मोठी चूक पंचांनी केली आहे. त्या रेफरीला १० वर्षांसाठी कुस्तीमधून निलंबित केले पाहिजे. आम्ही फेडरेशनसमोर जाऊन सत्य उघड करण्यास तयार आहोत. जर त्यांनी आमच्या विरोधात निर्णय दिला, तर आम्ही तो मान्य करू. पण या निलंबनाविरोधात आम्ही ऑल इंडिया फेडरेशनकडे न्याय मागू. तिथे न्याय मिळाला नाही, तर आम्ही थेट वर्ल्ड रेसलिंग फेडरेशनकडे जाऊ.’ अशी भूमिका काका पवारांना मांडली.

‘आम्ही न्याय मागायला आलो, तर तुम्ही हाकलून लावता. वर आम्हाला ‘तुमची काय लायकी आहे’ असं बोलता? तो आमचा मल्ल डबल महाराष्ट्र केसरी आहे,” असे संतप्त उद्गार देखील काका पवार यांनी काढले.

‘हा खेळाडूंवरील राजकीय डाव’

‘ही संपूर्ण घटना म्हणजे खेळाडूंसोबत राजकीय खेळी आहे. पण खेळाडूंसोबत राजकारण करू नका. शिवराज राक्षे आमचाच आहे, पृथ्वीराजही आमचाच आहे. संपूर्ण महाराष्ट्रातील खेळाडू आमचेच आहेत. त्यांना न्याय मिळवून देण्याचा प्रयत्न करा,’ असे आवाहनही पवारांनी केले.

महाराष्ट्र केसरी स्पर्धा बेकायदेशीर होती का?

या प्रश्नावर काका पवार संतापून म्हणाले, “हो, महाराष्ट्र केसरी स्पर्धा झाली, पण तिचे प्रमाणपत्र पोलिस भरतीसाठी वैध नाही. तुमचे कोणतेही प्रमाणपत्र वैध नाही, पण बाळासाहेब लांडगे आणि पवार साहेबांच्या सहीचे पत्र मात्र मान्य होते. मग तुमचे कसे चालते?”

ते पुढे म्हणाले, “महाराष्ट्र कुस्तीगीर संघटनेत दोन वेगवेगळ्या संघटना आहेत, आणि या वादावर सर्वोच्च न्यायालयात सुनावणी सुरू आहे. मग अशा परिस्थितीत तुम्हाला महाराष्ट्र केसरी स्पर्धा घेण्याचा अधिकार कोणी दिला? त्यामुळे आम्ही ही स्पर्धा मान्य करू शकत नाही.’ या संपूर्ण वादामुळे महाराष्ट्र केसरी स्पर्धेभोवती नवा वाद निर्माण झाला आहे.