नांदेड जिल्ह्यातील कंधार तालुक्यातील परांडा गावातील सात वर्षीय प्रांजल कदम ही २० जानेवारी दुपारी शाळेतून घरी आली. घरी आल्यानंतर ती खेळण्यासाठी घराबाहेर पडली. मात्र सायंकाळपर्यंत ती घरी परतली नाही. मुलगी बेपत्ता झाल्याने कुटुंबियांकडून शोध घेण्यात आला, मात्र तिचा शोध काही लागला नाही. भयभीत झालेल्या कुटुंबियांनी माळाकोळी पोलीस ठाण्यात धाव घेऊन याबद्दल तक्रार दाखल केली. पोलिसांनी अपहरणाचा गुन्हा दाखल केला. दोन जणांनी मोटार सायकलवर येऊन अपहरण केले असा आरोप कुटुंबियाकडून करण्यात आला होता.
Hyderabad News: माजी जवानाने पत्नीला संपवलं, बॉडीचे तुकडे करुन कुकरमध्ये शिजवलं अन् मग… अंगावर काटा आणणारी घटना
पोलिसांनी घटनेच गांभीर्य ओळखून वरिष्ठ अधिकाऱ्यांपासून ते कॉन्स्टेबल प्रांजल कदम हिच्या शोधात जु़टले. विविध पथकांकडून तिचा शोध घेण्यात आला, पण मुलीबाबत कोणताच ठावठिकाणा लागत नव्हता. इकडे कुटुंबियांमध्ये चिंता वाढत होती. त्यानंतर पोलिसांनी गावातील प्रत्येक घराची झाडाझडती घेण्यास सुरुवात केली. यावेळी शोभाबाई गायकवाड यांच्या घरात प्रांजल डांबून ठेवलेल्या अवस्थेत मिळाली. घराबाहेर गेल्यास तुला पळवून नेतील, तुझ्या किडण्या काढून घेतील, अशी भीती गायकवाड कुटुंबियांकडून मुलीला दाखवण्यात आली होती. या भीतीमुळे मुलीने दोन दिवस आरडाओरड केली नाही.

शोभाबाई गायकवाड, तिचा पती आणि मुलानेच हे अपहरण केले होते. याप्रकरणी माळाकोळी पोलिस ठाण्यात शोभाबाई गायकवाड (वय ५५), तिचा पती शेषेराव गायकवाड (वय ६०) आणि मुलगा चंद्रकांत गायकवाड (वय ३८) या तिघाना ताब्यात घेऊन त्यांच्या विरोधात कलम १३७ (२) नुसार गुन्हा दाखल केला आहे. मुलीला घरात डांबून अपहरण, अघोरी प्रकार, नरबळी किंवा अन्य काही प्रकार करण्याचा आरोपीचा उद्देश होता का याचा तपास पोलीस करत आहेत. दरम्यान पोलिसांच्या तत्परतेमुळे मुलीची सुटका झाली असून तिचा जीव वाचला आहे.