सैफवर हल्ला का केला?
चौकशी दरम्यान आरोपी शहजादने पोलिसांना सांगितले की, सैफच्या पकडीतून सोडवण्यासाठी त्याच्या पाठीवर अनेकदा वार केले आणि हल्ल्यानंतर तिथून पळ काढला. त्यानंतर इमारतीमधील गार्डनमध्ये दोन तास लपून राहिला. एका पोलिस अधिकाऱ्याने सांगितले की, आरोपी हा चोरी करण्यासाठी बाथरुमच्या खिडकीतून फ्लॅटमध्ये शिरला. तो शिरताच क्षणी नोकरांनी त्याला पाहिले.
हल्ल्यानंतर सैफला वाटले आरोपी घरातच आहे त्यामुळे त्याने दरवाजा बंद केला होता. मात्र हल्लेखोराने पुन्हा बाथरुमच्या खिडकीतूनच पळ काढला.

बांगलादेशातून मुंबईत कसा पोहचला?
आरोपी शहजाद बांगलादेशमधील झालोकाथी जिल्ह्यातील रहिवासी असून तो पाच महिन्यांपासून मुंबईत राहत होता. तो लहान सहान कामे करत असे. तसेच तो एका हाऊसकिपिंग एजेन्सीशी जोडला गेला होता. शहजादने विजय दास या खोट्या नावाचा वापर केला. सात महिन्यांपूर्वी त्याने बांगलादेशातील नदी ओलांडत भारतात प्रवेश केला होता. पश्चिम बंगालमध्ये काही आठवडे राहिल्यानंतर नोकरीच्या शोधात त्याने मुंबई गाठले.

बांगलादेशी घुसखोर असलेल्या आरोपीने सिम कार्ड कसे मिळवले ?
मुंबईत येण्या अगोदर एका स्थानिक व्यक्तीचे आधारकार्ड वापरत त्याने सिम कार्ड मिळवले. खुकुमोनी जहांगीर या पश्चिम बंगालमधील नागरिकाच्या नावाने शहजादच्या सिमकार्डची नोंदणी केली गेली आहे. पोलिस तपासामध्ये त्याने केली असता त्याने बांगलादेशातील आपल्या कुटुंबाला कॉल केल्याचे समोर आले आहे.

कागदपत्रे नसतानाही मुंबईत कसे मिळाले काम?
आरोपी शहजादने आधारकार्ड बनवण्याचा प्रयत्न केला मात्र त्यात त्याला यश आले नाही. त्यानंतर त्याने असे काम शोधण्यास सुरूवात केली ज्यासाठी कागदपत्रांची आवश्यकता नाही. एका कामगार कंत्राटदाराने त्याला वरळी आणि ठाण्याचा पब आणि हॉटेलमध्ये हाऊसकीपिंगचे काम मिळवून देण्यास मदत केली.