Aditi Tatkre Appointed as Raigad Guardian Minister : विधानसभा निवडणूक पार पडल्यानंतर रायगड जिल्ह्याच्या पालकमंत्रीपदी पदासाठी शिवसेना-भाजपमध्ये रस्सीखेच सुरु झाली होती. मात्र आज सरकारने जाहीर केलेल्या यादीत रायगड जिल्ह्याच्या पालकमंत्रीपदी अदिती तटकरे यांची वर्णी लागली आहे.
रायगडच्या पालकमंत्रीपदावरून महायुतीत संघर्ष निर्माण झाला होता. आदिती तटकरे यांना पालकमंत्रीपद मिळू नये यासाठी रायगड जिल्ह्यातील शिवसेना आमदारांनी मोर्चेबांधणी केली होती. भरत गोगावले यांच्याकडे पालकमंत्रीपद दिले जावे यासाठी जिल्ह्यातील सर्वच आमदारांना विश्वासात घेण्यात आले होते. मात्र आज पालकमंत्रीपदाची यादी जाहीर झाली आहे. रायगड जिल्ह्याचे पालकमंत्रीपद पुन्हा अदिती तटकरे यांच्याकडे देण्यात आले आहे. यावर आता जिल्ह्यातील शिवसेनेचे आमदार काय भूमिका घेतात याकडे सर्वांचेच लक्ष लागले आहे.
रायगड जिल्ह्याच्या पालकमंत्रिपदावरुन राष्ट्रवादी काँग्रेस विरुद्ध शिवसेना असा थेट सामना होता. राष्ट्रवादीच्या महिला व बालविकास मंत्री अदिती तटकरे आणि शिवसेनेचे मंत्री भरतशेठ गोगावले यांच्यात थेट स्पर्धा होती. भरत यांनी अनेकदा पालकमंत्रीपदावर दावा ठोकला होता. मात्र अखेर आदिती तटकरे यांनी गोगावलेंवर मात केली आहे. आदिती तटकरे या रायगड जिल्ह्याच्या पालकमंत्री असणार आहेत. भरत गोगावले रायगडच्या पालकमंत्रीपदासाठी आग्रही होते. भरत गोगावले यांनी एकदा पालकमंत्रीपदावरुन बोलताना अजब वक्तव्य केलं होतं. ‘आदिती तटकरे यांनी पालकमंत्री म्हणून चांगलं काम केलं असलं तरी मी त्यांच्यापेक्षा मी चांगलं काम करून दाखवेन. शेवटी महिला आणि पुरुषात काही फरक आहे की नाही?’ असे गोगावले यांनी म्हटलं होतं. यावरुन चांगलाच वादही रंगला होता. परंतु गोगावलेंवर आता तटकरे भारी पडल्याचे चित्र आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा