आजोबांसोबत घरी येताना काळाचा घाला

नंदुरबार शहरातील माळीवाडा परिसरातील होलार वाडा येथे राहणाऱ्या कार्तिक एकनाथ गोरवे (वय ७ वर्ष ) याच्या आईचे वडील हे नंदुरबार शहरातील सरोज नगर येथे राहतात. आजोबा अंबु जाधव यांच्यासोबत सकाळी कार्तिक जेवण करण्यासाठी सरोज नगर येथे गेला होता. त्यानंतर आजोबा अंबु जाधव हे कार्तिकला त्याच्या घरी सोडण्यासाठी मोटरसायकलने जात होते. कार्तिक हा मोटरसायकलवर पुढे बसला होता.
संतापजनक! परप्रांतीय महिलेवर लैंगिक अत्याचार करून ठेवले डांबून, धक्कादायक घटनेने बारामती हादरली

मांजाने गळा कापला, कुटुंबावर शोककळा

दुपारी तीन वाजेच्या सुमारास शहरातील सरोज नगर परिसरात मोटरसायकल जात असताना अचानक एका नायलॉन मांजा समोर आला. तो मांजा कार्तिकच्या गळ्याला लागला. यात कार्तिक एकनाथ गोरवे याचा गळा कापला गेला. गळा कापला गेल्याने मोठ्या प्रमाणात रक्तस्त्राव झाल्याने कार्तिकचा मृत्यू झाला. त्याच्यावर जिल्हा रुग्णालयात शवविच्छेदन करण्यात आले. यावेळी कार्तिकचे नातेवाईक तसेच परिसरातील नागरिकांनी मोठी गर्दी केली होती. मकर संक्रांतीच्या दिवशी गोरवे तसेच जाधव परिवारावर दुःखाचा डोंगर कोसळला आहे. बंदी असतानाही वापरात असलेल्या नायलॉन मांजामुळे एका निष्पाप बालकाला आपला जीव गमवावा लागला.

प्रशासनाने कारवाई न केल्याने चिमुकल्याचा मृत्यू

कार्तिक एकनाथ गोरवे हा बालक नंदुरबार शहरातील कमला नेहरूमध्ये इयत्ता दुसरीत शिकत होता. या निष्पाप बालकाला नायलॉन मांजामुळे जीव गमवावा लागला. नंदुरबार शहर तसेच जिल्ह्यात मोठ्या प्रमाणावर बंदी असलेल्या नायलॉन मांजाचा वापर करण्यात आला. प्रशासनाने नायलॉन मांजावर थातूरमातूर कारवाई केली. प्रशासनाने नागरिकांना आवाहन करण्यातच धन्यता मानली असल्याची चर्चा नागरिकांमध्ये आहे. घटनेनंतर नागरिकांमध्ये प्रशासनाविरोधात तीव्र नाराजी पसरली आहे.