करोना काळातील कटू आठवणी ताज्या असल्यानं HMPVचा शिरकाव होत असल्याच्या बातम्या येताच भारतीयांना धडकी भरली. या सगळ्या पार्श्वभूमीवर पल्लवी सापळेंनी महत्त्वाची माहिती देत सगळ्यांचीच चिंता दूर केली. ‘HMPVला घाबरण्याचं काहीच कारण नाही. करोना विषाणू नवा होता. म्हणून त्याला नोवल करोना व्हायरस म्हटलं गेलं. HMPV हा ५० ते ६० वर्षांपासून अस्तित्त्वात आहे. तो जगभर पसरलेला आहे. त्यामुळे अनेकांच्या शरीरात आधीच प्रतिकारशक्ती तयार झालेली आहे,’ असं सापळे यांनी सांगितलं.
चीनमधून आलेला नवा विषाणू किती धोकादायक? AIIMSकडून महत्त्वाची अपडेट, डॉक्टरांनी काय सांगितलं?
‘आपल्याकडे २००४ मध्ये पुण्यात HMPVचे रुग्ण सापडले होते. तशी नोंद आहे. २०११ मध्ये एम्सनं प्रसिद्ध केलेल्या अहवालात तसा उल्लेख आहे. २०२२-२३ या कालावधीत पुण्यातील १३ टक्के मुलांना HMPVची संसर्ग झालेला आहे. केईएमच्या अहवालात तशी माहिती आबे. हा विषाणू सगळीकडे आधीपासूनच असल्यानं ५ वर्षांपर्यंतची मुलं कधी ना कधी त्याच्या संपर्कात येतात. त्यामुळे त्यांची प्रतिकारशक्ती तयार झालेली असते,’ अशी माहिती सापळेंनी दिली.

‘HMPV करोनासारखाच संसर्गजन्य रोग आहे. पण करोना नवा असल्यानं, तो सातत्यानं म्युटेट होत असल्यानं त्याची लागण झालेल्या रुग्णांवर उपचार करणं अवघड गेलं. HMPVमध्ये मृत्यूचं प्रमाण कमी आहे. तो चीनमधून आलेला नाही. हा विषाणू नवा नाही. रोगप्रतिकारशक्ती कमी असलेल्यांना त्याची लागण होते. सर्दी, पडसं, ताप, खोकला हीच त्याची लक्षणं आहेत. त्यामुळे घाबरण्यासारखं काहीच नाही,’ असं सापळे यांनी सांगितलं.
HMPV: करोनानंतर जगाला HMPVचा धोका; महाभयंकर विषाणू चीनमधूनच कसे पसरतात? ४ महत्त्वाची कारणं समोर
‘बाळांची रोगप्रतिकारशक्ती कमी असल्यानं त्यांना HMPVची लागण होते. त्यामुळे त्यांची काळजी घेणं गरजेचं आहे. HMPV होऊ नये यासाठी घेण्याची काळजी करोना काळात घेतलेल्या काळजीसारखीच आहे. शिंकताना, खोकताना तोंडावर हात ठेवा. चेहऱ्याला हात लावणं टाळा. वारंवार हात धुवा. मात्र मास्क घालण्याची गरज नाही,’ अशा सूचना सापळे यांनी केल्या.