बच्चू कडू यांचा यंदाच्या विधानसभा निवडणुकीत दारुण पराभव झाला आहे. यानंतर कडूंनी महिन्याने आता एका गावातील मतदानाच्या आकडेवारीचा संदर्भ देत ईव्हीएममध्ये घोळ झाला असल्याचे म्हटले आहे. बच्चू कडू म्हणाले की, माझं मतं कुणाला गेलं हे माहित असणं सामान्य मतदाराचा अधिकार आहे. मात्र आता व्हीव्हीपॅट म्हणजे वरलीचा खेळ झाला आहे. त्यासाठी आम्ही आता कोर्टात जाऊ, कोर्टही बदमाश आहे. कोर्ट आम्हाला न्याय देईल असं वाटत नाही, पण आम्ही कोर्टात जाणार, असा निर्धार बच्चू कडूंनी केला आहे.

बच्चू कडू निवडणूक लढवलेल्या अचलपूर मतदारसंघातील एका गावात मला मतदान कमी झाले आहे, असा उल्लेख त्यांनी स्वत: केला आहे. कडू पुढे म्हणाले, ब्राह्मणवाडा थडी येथील मतदान केंद्रावर मला मागच्या निवडणुकीत १४८ मतं मिळाली होती. मात्र, यंदाच्या निवडणुकीत केवळ ६० मतं मिळाली आहेत. विशेष म्हणजे त्या गावातील १२५ लोकांनी मला स्टॅम्प पेपरवर लिहून दिलं आहे, ज्यामध्ये आम्ही तुम्हालाच मतदान केल्याचे ते सांगत आहेत. त्यामुळे याप्रकरणी आम्ही आता कोर्टात जाऊ, असेही ते म्हणाले.

दरम्यान माळशिरस तालुक्यातील मारकडवाडी या गावातील नागरिकांनी ईव्हीएममध्ये घोळ असल्याचे सांगत मतदान आंदोलन सुरु केले होते. तर आम्ही बॅलेट पेपर पुन्हा मतदान घेणार असा पवित्रा साऱ्या गावकऱ्यांनी घेतला होता. त्यांना समर्थन देण्यासाठी महाविकास आघाडीतील नेतेही पुढे सरसावले आणि ईव्हीएम प्रणालीचा कडाडून विरोध केला. परंतु गेल्या काही दिवसांपासून ईव्हीएम विरोधी मोहिमेची धार बोथट झाल्याचे पाहायला मिळत आहे. यातच आता बच्चू कडूंनी ईव्हीएम विरोधाची तार छेडली आहे.