वडिल मदतीसाठी धावले, समोर मुलाचा मृतदेह दिसला

कुर्ला बस अपघातात शिवम कश्यप या मुलाचा मृत्यू झाला. बसचा जिथे अपघात झाला, त्याच ठिकाणी शिवमच्या वडिलांचं कपड्याचं दुकान आहे. बसच्या धडकेनंतर शिवमचे वडील घटनास्थळी धावले आणि जखमींना ते मदत करू लागले. इतरांना मदत करत असतानाच त्यांना इतर जखमींमध्ये त्यांचा स्वत:चा मुलगा शिवम दिसला. वडिलांनी तात्काळ मुलाला घेऊन रुग्णालयात धाव घेतली, पण त्याआधीच शिवमचा मृत्यू झाला होता. या घटनेनंतर कुटुंबावर दु:खाचा डोंगर कोसळला असून परिसरात शोक व्यक्त केला जात आहे.
Pune Crime : भाजप आमदार योगेश टिळेकरांच्या अपहरण झालेल्या मामाची हत्या, यवत गावच्या हद्दीत मृतदेह
शिवमच्या वडिलांचं कपड्याचं दुकान असल्याने तो कॉलेजवरुन आल्यानंतर दुकानात जायचा. वडिलांना मदत करायचा. बस अपघाताच्या दिवशीही तो तिथे होता, पण त्याला भूक लागली असल्याने ते नाश्ता करायला गेला आणि त्याचवेळी नियतीने घात केला.

संजय मोरेच्या पत्नीची प्रतिक्रिया

दरम्यान, या अपघातातील आरोपी बस ड्रायव्हर संजय मोरे याने गाडीचं नियंत्रण सुटल्याचं सांगितलं आहे. या घटनेनंतर त्याला सदोष मनुष्यवधाचा गुन्हा दाखल करुन २१ दिवसांची पोलीस कोठडी सुनावण्यात आली आहे. कुर्ला बस अपघात प्रकरणात विविध गोष्टी बोलल्या जात आहेत. काही प्रत्यक्षदर्शींनी संजय मोरे यांनी मद्यपान केल्याचं म्हटलं आहे. तर संजय मोरेच्या पत्नीने ते कोणतंही व्यसन करत नसल्याचं म्हटलं आहे. याआधी कधीही त्यांच्याकडून बसचा अपघात झाला नसल्याचंही त्यांच्या पत्नीने म्हटलं आहे. जी घटना घडली ती चुकून झाली असेल, बसचा दोष असावा, तुमच्या गाड्या व्यवस्थित नाही, माझ्या नवऱ्याची काहीही चूक नाही, असंही संजय मोरेच्या पत्नीने सांगितलं.