मृत अरुणा अभय काकडे या चंद्रपूर जिल्ह्यातील चिमूर येथील रहिवासी होत्या. महिलेचे देवांश जनरल स्टोअर्स नावाचे दुकान आहे. दुकानासाठी काही कॉस्मेटिक वस्तू घेण्यासाठी ती २६ नोव्हेंबरला नागपुरात आली होती. ती नागपूरच्या गांधीबाग परिसरात पोहोचली. दुपारी बारा वाजता अरुणा यांनी पतीला फोन करून नागपूरला पोहोचल्याची माहिती दिली. यानंतर महिलेचा फोन बंद लागत होता. सायंकाळ होऊनही पत्नी घरी न परतल्याने पतीला काळजी वाटू लागली, त्यांनी अरुणाचा शोध सुरू केला. अखेर पतीने चिमूर पोलीस ठाण्यात पत्नी बेपत्ता झाल्याची तक्रार दाखल केली.
घराच्या विक्रीचा वाद अन् पत्नीसोबत भयंकर घडलं; पतीचा अमानुषपणे वार, अंगावर काटा आणणारा व्हिडीओ समोर
नागपुरातही तहसील पोलिसांनी बेपत्ता असलेल्या अरुणा यांचा शोध सुरू केला. अखेर चंद्रपूर पोलिस दलाच्या सायबर सेलने तांत्रिक तपास करून महिलेच्या मोबाईलचा सीडीआर काढला. यामध्ये अरुणा या चंद्रपूर पोलीस दलातील बडतर्फ पोलीस अधिकारी नरेंद्र दाहुले यांच्याशी संपर्कात असल्याचे दिसून आले. त्यामूळे महिला बेपत्ता होण्यामागे नरेंद्र दाहुले यांचा सहभाग असल्याचे संकेत मिळत होते. त्यांना नुकतेच चंद्रपूर पोलिसांनी दुचाकी चोरीच्या गुन्ह्यात अटक केली होती आणि त्यांना पोलीस दलाातून बडतर्फ करण्यात आले होते.

अरुणा काकडे बेपत्ता होण्यामागे दाहुलेंची भूमिका संशयास्पद होती. यानंतर पोलिसांनी प्रकरणाचा छडा लावत दाहुलेंना बेड्या ठोकल्या. त्यांची कसून चौकशी केली असता त्यांनी गुन्ह्याची कबुली दिली. अरुणाचा गळा दाबून हत्या केल्याची त्यांनी कबुली दिली. यानंतर मृतदेहाची विल्हेवाट लावण्यासाठी नागपूरच्या काही भागात कार फिरवली. कुठेही जागा न मिळाल्याने बेलतरोडी रोडवरील वेळाहरी गावाजवळील जंगलात तिचा मृतदेह पुरल्याचे त्यांनी जबाबात सांगितले.

चंद्रपूर पोलिसांनी आरोपीला नागपुरात पोलीस ठाण्यात आणले. यानंतर आरोपीच्या सांगण्यावरून चंद्रपूर पोलिसांनी तहसीलदारांच्या उपस्थितीत पुरलेला मृतदेह बाहेर काढला आहे. याप्रकरणी सध्या चंद्रपूर पोलीस अधिक तपास करत आहेत.