परभणी विधानसभा मतदारसंघातही लोकसभा निवडणुकीत ६२.६३% एवढे मतदान झाले होते. त्यामध्ये केवळ तीन टक्के मतदानाची वाढ झाली असून ६५.६१% मतदान विधानसभा निवडणुकीत झाले आहे. परभणी विधानसभा मतदारसंघात शिवसेना उद्धव बाळासाहेब ठाकरे पक्षाकडून तिसऱ्यांदा निवडणूक रिंगणात उभे असलेले आमदार डॉक्टर राहुल पाटील यांच्याविरोधात शिवसेना एकनाथ शिंदे यांच्या पक्षाचे आनंद भरोसे यांनी कडवे आव्हान दिले आहे. परभणी विधानसभा मतदारसंघात दुरंगी लढत झाली असल्याने मतदानाच्या टक्क्यांमध्ये तेवढी वाढ झाली नाही. जिल्ह्यातील अन्य तीनही विधानसभा मतदारसंघात मोठ्या प्रमाणावर मतदान वाढले असले तरी मात्र परभणी विधानसभा मतदारसंघात असे चित्र दिसले नाही. दुरंगी लढत झालेल्या या निवडणुकीत कोणाचा विजय होईल हे निवडणूक निकालानंतर स्पष्ट होईल. पण वाढलेले तीन टक्के मतदान कोणाच्या पारड्यात जाते हे मात्र आता सांगता येणार नाही.

गंगाखेड विधानसभा मतदारसंघात ६३% मतदान हे लोकसभा निवडणुकीत झाले होते. त्यामध्ये तब्बल नऊ टक्के वाढीव मतदान विधानसभा निवडणुकीत झाले आणि गंगाखेड विधानसभा मतदारसंघात काल ७२.०१ टक्के मतदान झाले असल्याची नोंद झाली आहे. गंगाखेड विधानसभा मतदारसंघात राष्ट्रीय समाज पक्षाचे आमदार डॉक्टर रत्नाकर गुट्टे यांच्याविरोधात शिवसेना उद्धव बाळासाहेब ठाकरे पक्षाचे विशाल कदम आणि वंचित बहुजन आघाडीचे माजी आमदार सिताराम घनदाट यांनी कडवे आव्हान दिले. तिरंगी लढत झालेल्या या विधानसभा मतदारसंघात लोकसभेपेक्षा तब्बल नऊ टक्के मतदान जास्त झाले आहे. या मतदारसंघात लक्ष्मी अस्त्राचा वापर देखील मोठ्या प्रमाणावर झाला. त्यामुळे वाढलेल्या मतदानाचा फायदा कोणाला होईल? हे मात्र नंतर स्पष्ट होईल. पण तिरंगी लढतीमुळे मतदानाचा टक्का वाढल्याने सगळ्यांची धाकधूक वाढली आहे.

पाथरी विधानसभा मतदारसंघात लोकसभा निवडणुकीत ६४.२७% हे सर्वाधिक मतदान झाले होते. त्यापाठोपाठ आता विधानसभा निवडणुकीतही सहा टक्के मतदान जास्त झाले असून ७०.०२% मतदान पाथरी विधानसभा मतदारसंघात काल झालेल्या विधानसभा निवडणुकीसाठी झाले आहे. पाथरी विधानसभा मतदारसंघात काँग्रेसचे आमदार सुरेश वरपूडकर यांच्याविरोधात राष्ट्रवादीचे आमदार राजेश विटेकर राष्ट्रीय समाज पक्षाचे सईद खान अपक्ष बाबाजानी दुर्राणी या तिघांनी कडवे आव्हान दिले आहे. चौरंगी झालेल्या या विधानसभा निवडणुकीत कोणाचे पारडे जड आहे? हे मात्र आत्ताच सांगता येणार नाही. विधानसभा निवडणुकीत महाविकास आघाडीसोबतच महायुतीमध्ये मोठ्या प्रमाणावर बंडखोरी झाली. या बंडखोरीचा तोटा कोणाला होतो हे मात्र निवडणूक निकालानंतर स्पष्ट होईल.
सर्व माऊलींना ग्वाही देतो की, मी लवकरच…आदेश बांदेकर यांचं टीव्हीवर कमबॅक? पुन्हा होम मिनिस्टर? प्रेक्षकांना उत्सुकता

एकंदरीतच परभणी जिल्ह्यातील चार विधानसभा मतदारसंघात लोकसभा निवडणुकीत ६३ टक्के मतदान झाले होते. आता विधानसभा निवडणुकीत सात टक्के मतदान वाढले असून ७०.३८% मतदान झाले आहे. वाढलेले सात टक्के मतदान कोणाच्या पारड्यात पडेल त्यांचा विजय निश्चित असल्याचे स्पष्ट होत आहे. चारपैकी जिंतूर आणि गंगाखेड विधानसभा मतदारसंघात सरासरी १० टक्के मतदान वाढल्याची नोंद आहे. या दोन्ही मतदारसंघ यापूर्वी महायुतीकडे होते. या मतदारसंघात मोठ्या प्रमाणावर बंडखोरी देखील झाली. त्यामुळे वाढलेले मतदान कोणाच्या पारड्यात जाईल आणि कसा निकाल लागेल? हे मात्र निवडणूक निकालानंतर स्पष्ट होईल.