शेतकरी कामगार पक्षाचे सरचिटणीस जयंत पाटील यांनी मतदानाच्या आदल्या दिवशी पेण आणि उरण मतदारसंघात भाजप-महायुतीच्या उमेदवारांना पाठिंबा जाहीर केल्याचे पत्र समाज माध्यमांवर व्हायरल झाल्याने खळबळ उडाली आहे. या पत्रामुळे महाविकास आघाडी आणि उद्धव ठाकरेंच्या शिवसेनाला मोठा धक्का बसला आहे.

पेण आणि उरणमधील शेकापचे विजयी उमेदवार अतुल म्हात्रे आणि प्रीतम म्हात्रे या दोघांची उमेदवारी रद्द करुन भाजपच्या उमेदवारांना शेकापने पाठिंबा दिल्याचे खोटे पत्र विरोधकांनी व्हायरल केले आहे. या लेटरहेडवर दहा वर्षापूर्वीचे पदाधिकारी आहेत. त्यातील काही आज आपल्यामध्येही नाहीत. असे लेटरहेड वापरुन त्यांनी खोटे पत्रक तयार केले आहे. त्यांच्यावर फौजदारी गुन्हा दाखल करण्यात येणार आहे. पक्षाचे कार्यालयीन चिटणीस ॲड. राजू कोरडे त्याबाबतची कार्यवाही करत आहेत, अशी माहिती जयंत पाटील यांनी दिली.
Rohit Pawar : जामखेडमध्ये पैसे वाटप प्रकरणावर रोहित पवार यांची पहिलीच प्रतिक्रिया, पाहा काय म्हणाले…
विरोधकांनी जो खोडसाळपणा केला आहे, त्यावर पेण व उरणमधील शेकापचे कार्यकर्ते, मतदार, हितचिंतकांनी विश्वास ठेऊ नये. विरोधकांना पराभव स्पष्ट दिसत आहे. त्यामुळे त्यांनी हे गलिच्छ कृत्य केले आहे. याचे मुख्य सुत्रधार उरणचे भाजप आ. महेश बालदी असल्याचा संशय असून पोलिसांनी आरोपींवर तात्काळ कारवाई करुन त्यांना अटक करावी. तसेच ज्यांनी हे पत्र व्हायरल केले आहे, त्यांच्यावरही कारवाई करण्याची मागणी जयंत पाटील यांनी केली आहे.

मात्र, हे बनावट पत्र असून याविरोधात शेकापने मुख्य निवडणूक अधिकारी तसेच अलिबाग सायबर आणि उरण पोलिसांत तक्रार केली आहे. तसेच हे कृत्य भाजपचे उमेदवार महेश बालदी आणि रवींद्र पाटील यांनी केल्याचा संशय त्यांनी तक्रारीतून व्यक्त केला आहे. त्यामुळे जयंत पाटील यांच्या बनावट सहीचे पत्र व्हायरल करून कुणाला फायदा करून घ्यायचा होता, असा प्रश्न उपस्थित होत आहे.
Vinod Tawde : माहिती नसतानाचा बोलणं बालिशपणा.., राहुल गांधींच्या आरोपांवर विनोद तावडेंचं प्रत्युत्तर
मतदानाला अवघे काही तास उरलेले असताना मंगळवारी रात्री रायगड जिल्ह्यात खळबळ उडाली. शेकापचे सरचिटणीस जयंत पाटील यांच्या सहीचे पत्रक व्हायरल करून त्यात उरणमध्ये भाजपचे महेश बालदी आणि पेणमध्ये भाजपचे रवींद्र पाटील यांना पाठिंबा जाहीर केल्याचे या पत्रात स्पष्टपणे नमूद केले आहे. एवढेच नाही तर भाजपच्या या दोन्ही उमेदवारांकडे उरण आणि पेणच्या विकासाचे धोरण आहे. त्यामुळे जर हे उमेदवार जिंकून आले तर उरण आणि पेणचा सर्वांगीण विकास होईल, असे नमूद केल्यामुळे रायगडमध्ये खळबळ उडाली होती.

पक्षाच्या अधिकृत उमेदवाराबाबत सर्वसामान्य मतदारांमध्ये संभ्रम निर्माण होईल, तसेच पक्षाची जनसामान्यांमध्ये बदनामी करण्याच्या हेतूने हे कृत्य केले असून उरणमधील भाजपचे उमेदवार महेश बालदी आणि पेणचे उमेदवारी रविशेठ पाटील यांनी हे केल्याची दाट शक्यता आहे. या प्रकरणी फौजदारी गुन्हा दाखल करुन सखोल चौकशी करण्याची मागणी कार्यालयीन चिटणीस ॲड. राजू कोरडे यांनी केली आहे. याबाबत शेकापच्यावतीने महाराष्ट्र राज्य मुख्य निवडणूक अधिकारी, पेण व उरणचे निवडणूक अधिकारी, अलिबागचे सायबर गुन्हे शाखेचे वरिष्ठ पोलीस अधिकारी व उरणचे पोलीस निरीक्षक यांच्याकडे तक्रार करण्यात आली आहे.