धनाजी चव्हाण, परभणी : परभणी लोकसभा निवडणुकीचा इतिहास पाहता आजपर्यंत परभणी मतदारसंघातून केवळ शिवाजीराव देशमुख या एकमेव उमेदवाराला तीनदा लोकसभेचा खासदार होण्याचा योग आला. यानंतर तिघांना ही संधी चालून आली होती. पण एक तर संबंधित पक्षाने त्या उमेदवाराचे तिकीट कापले किंवा मतदारांनी त्यांना निवडणुकीत नाकारल्याचा इतिहास आहे. पण हॅट्रिक करण्याची संधी संजय जाधव यांना यावेळेस मिळाली आहे. संजय जाधव हे २०१४ व २०१९ असे दोन वेळेस खासदार म्हणून निवडून आले आहेत. आणि आता त्यांना तिसऱ्या वेळेस शिवसेनेकडून संधी मिळाल्याने संजय जाधव यांना हॅट्रिकचा इतिहास बदलणार का? हे पाहावे लागणार आहे.परभणी लोकसभेची ही १८वी निवडणूक आहे. १९५१ पासून आपर्यंत केवळ शिवाजीराव देशमुख यांनाच तीनदा खासदार होण्याचा योग आला. त्यानंतर रामराव यादव, अशोक देशमुख सुरेश जाधव या तिघांना दोन वेळेस खासदारकीचा योग आला. या तिघांपैकी दोघांना तिसऱ्यांदा खासदारकीची निवडणूक लढण्याची संधी देखील मिळाली पण त्यांना पराभव पत्करावा लागला. त्याचबरोबर नारायणराव वाघमारे, नागोराव केरोजी शेषराव, देशमुख सुरेश वडपुरकर, तुकाराम रिंगे पाटील, गणेश दुधगावकर यांना एक वेळेस खासदार होता आले.
काँग्रेसमधून मुक्ती मिळाल्याने हलकं वाटतंय, छातीवरचं ओझं उतरलं, संजय निरुपम यांची ‘मन की बात’

शिवाजीराव देशमुख यांनी भारतीय राष्ट्रीय काँग्रेसकडून १९६२ मध्ये पहिली खासदारकी मिळवली. त्यानंतर १९६७ मध्ये पुन्हा एकदा ते खासदार झाले. तिसऱ्यांदा १९७१ मध्ये त्यांनी भारतीय राष्ट्रीय काँग्रेसकडून निवडणूक लढवून तिसऱ्यांदा खासदार झाले. पण चौथ्या वेळेस मात्र ते निवडणुकीत उभे राहिलेच नाही. कारण काँग्रेसने लिंबाजीराव राऊत यांना तिकीट दिले. शिवाजीराव देशमुख यांनी सलग तीन वेळेस खासदार होण्याचा मान मिळवला. त्यांचे हे रेकॉर्ड आत्तापर्यंत कोणीही मोडू शकलं नाहीय.

संजय जाधव हे २०१४ पासून परभणी लोकसभेचे नेतृत्व करत आहेत. शिवसेनेकडून त्यांनी २०१४ आणि २०१९ दोन वेळेस लोकसभेची निवडणूक लढली आणि जिंकली. मध्यंतरी शिवसेनेमध्ये फूट पडली पण संजय जाधव उद्धव ठाकरेंसोबत एकनिष्ठ राहिले. त्यामुळे आता २०१४च्या लोकसभा निवडणुकीत महाविकास आघाडीकडून संजय जाधव यांना पुन्हा एकदा उमेदवारी देण्यात आली आहे. संजय जाधव यांना हॅट्रिक करण्याची संधी पक्षाने दिली आहे. शिवाजीराव देशमुख यांचे रेकॉर्ड मोडण्याची ही नामी संधी संजय जाधव यांना मिळाली आहे.

संजय जाधव यांच्या विरोधात आता महायुतीच्या वतीने राष्ट्रीय समाज पक्षाचे अध्यक्ष महादेव जानकर यांना निवडणुकीच्या रिंगणात उतरवले आहे. परभणी लोकसभेमध्ये मराठा विरुद्ध ओबीसी असा सामना रंगविण्याचा प्रयत्न भाजपच्या वतीने केला जात आहे. एकीकडे महायुतीची प्रचंड ताकद आणि दुसरीकडे महाविकास आघाडीचे कडवं आव्हान यामध्ये संजय जाधव आपल्या खासदारकीची हॅट्रिक करतील का? हे आता काही दिवसानंतरच आपल्याला पाहावयास मिळेल.

मात्र, या वेळची राजकीय गणिते बरीचशी वेगळी असून राजकीय स्थित्यंतरामुळे उमेदवारांसह मतदारसुद्धा चलबिचल असल्याची परिस्थिती आहे. त्यामुळे लोकसभेच्या रणांगणात आता महाविकास आघाडीच्या माध्यमातून उद्धवसेनेचे उमेदवार संजय जाधव यांच्या रणनीतीकडे विरोधी पक्षाच्या उमेदवारांसह पदाधिकारी आणि मतदारांचे लक्ष लागले आहे. तर, दुसरीकडे महायुतीचे उमेदवार महोदव जानकर हे जाधव यांच्याविरुद्ध कशी लढत देतात, यावरून जिल्ह्याचा राजकीय इतिहास बदलणार आहे. गत दोन वर्षांत राज्यातील राजकीय स्थित्यंतरानंतर या लोकसभा निवडणुकीला महत्त्व आले आहे. पक्षाच्या फाटाफुटीनंतर होणाऱ्या या निवडणुकीला प्रत्येक राजकीय पक्षाच्या वरिष्ठ नेत्यांसह पदाधिकाऱ्यांनी आपल्या अस्मितेचा मुद्दा पुढे करून प्रतिष्ठा पणाला लावली आहे.