धनाजी चव्हाण, परभणी: काँग्रेसचे जिल्हाध्यक्ष तथा पाथरी मतदारसंघाचे आमदार सुरेश वरपुडकर यांचे परभणी जिल्हा मध्यवर्ती बँकेचं सदस्यत्व अपात्र ठरविण्यात आले आहे. आमदार वरपुडकर हे परभणी जिल्हा मध्यवर्ती सहकारी बँकेचे विद्यमान संचालक तथा अध्यक्ष होते. पण विभागीय सहनिबंधकांनी त्यांना अपात्र ठरवले होते. या निर्णयाविरुद्ध वरपूडकर यांनी सर्वोच्च न्यायालयात धाव घेतली होती. सर्वोच्च न्यायालयाने हे प्रकरण विभागीय सहनिबंधक मुंबई यांच्याकडे चालवण्यास सांगितले होते. सरतेशेवटी त्यांनीही सुरेश वरपुडकर यांना अपात्र ठरवले आहे. या कारवाईमुळे सहकार आणि राजकीय क्षेत्रात मोठी खळबळ उडाली आहे.

मिळालेल्या माहितीनुसार, सहकारी संस्था मुंबई विभागाचे विभागीय सहनिबंधक बाजीराव शिंदे यांनी पारित केलेल्या आदेशात म्हटले आहे की, महाराष्ट्र सहकारी संस्था अधिनियम, 1960 चे कलम 73 क अ (1) (फ) (दोन) आणि (2) न्यायालयाचे विशेष अनुमती याचिका (क) क्र. 24458/2023 मधील दिनांक 25 जानेवारी 2024 रोजीच्या आदेशाच्या अनुषंगाने सहकार आयुक्त व निबंधक, सहकारी संस्था, महाराष्ट्र राज्य, पुणे यांच्या दिनांक 1 फेब्रुवारी 2024 रोजीच्या पत्रानुसार मला प्रदान केलेले अधिकारान्वये सुरेश अंबादास वरपुडकर यांना दि परभणी जिल्हा मध्यवर्ती सहकारी बँकेचे संचालक म्हणून अपात्र करण्यात येवून त्यांचे संचालक मंडळ सदस्यत्व बंद करण्यात येत आहे व त्यांची जागा रिकामी झाल्याचे मानण्यात येत आहे. हा आदेश दिनांक 22 मार्च 2024 रोजी पारीत करण्यात आला आहे.
राजकारण: जाधवांची हॅट्ट्रिक रोखण्याचं आव्हान; परभणीसाठी सारेच इच्छुक, कोणाची लॉटरी लागणार?

सुरेश वरपुडकर हे जिल्हा बँकेचे थकबाकीदार असल्याच्या कारणाने बँकेचे संचालकत्व अपात्र ठरविले आहे. महाराष्ट्र संस्था अधिनियम 1960 चे कलम 73 कअ (1)(फ) आणि (2) नुसार दि परभणी जिल्हा मध्यवर्ती सहकारी बँक परभणी बँकेचे संचालक म्हणून वरपुडकर यांना अपात्र ठरविण्यात आले आहे. जिल्हा बँकेची दोन वर्षांपूर्वी निवडणूक पार पडली होती. या निवडणुकीत सुरेश वरपूडकर यांच्या पॅनलला 11 जागांवर विजय मिळाला होता.
नांदेडमधून एक चव्हाण भाजपमध्ये, काँग्रेसचा दुसऱ्या चव्हाणांवर विश्वास, लोकसभेचे तिकीट जाहीर

वरपुडकर यांच्यावर का कारवाई?

जिल्ह्यातील वरपुड विविध कार्यकारी सेवा सहकारी संस्था जिल्हा बँकेची थकबाकीदार असल्यामुळे विभागीय सहनिबंधकांनी वरपुडकर यांचे बँकेचे सदस्यत्व अपात्र ठरविले आहे. दरम्यान, विभागीय सहनिबंधक जनार्दन गट्टे यांनी 20 ऑक्टोंबर 2023 रोजी या संदर्भातील आदेश पारित करीत तो जिल्हा बँकेस पाठविला. वरपुडकर हे जिल्हा मध्यवर्ती सहकारी बँकेचे विद्यमान संचालक तथा अध्यक्ष आहेत. २५ सप्टेंबर २०२२ रोजी वरपुड विविध कार्यकारी सेवा सहकारी संस्था मर्या. या संस्थेचे वरपुडकर यांनी संचालक पद धारण केले. त्याचदिवशी म्हणजे २५ सप्टेंबर २०२२ रोजी वरपुड विविध कार्यकारी सेवा सहकारी संस्था ही जिल्हा बँकेची कसूरदार/थकबाकीदार होती. या संदर्भातच आक्षेप दाखल झाल्यानंतर वरपुडकर यांच्या वतीने विभागीय सहनिबंधकांकडे कागदपत्रे सादर करण्यात आली. तसेच युक्तीवादही करण्यात आला. परंतु, विभागीय सहनिबंधक गुट्टे यांनी वरपुडकर व संस्थेने दिलेल्या खुलाशासह सादर केलेली कागदपत्रे व युक्तीवाद समाधानकारक नाही, असे स्पष्ट करीत विभागीय सहनिबंधक गुट्टे यांनी महाराष्ट्र संस्था अधिनियम 1960 चे कलम 73 क अ (1)(फ) आणि (2) नुसार दि परभणी जिल्हा मध्यवर्ती सहकारी बँक परभणी बँकेचे संचालक म्हणून अपात्र ठरविले होते.

या निर्णयाविरुद्ध वरपूडकर यांनी सर्वोच्च न्यायालयात धाव घेतली होती. सर्वोच्च न्यायालयाने हे प्रकरण विभागीय सहनिबंधक मुंबई यांच्याकडे चालवण्यास सांगितले होते. त्यांनी निर्णय देताना आमदार सुरेश वरपूडकर जिल्हा बँकेचे संचालक म्हणून अपात्र ठरविल्याने आता अध्यक्षपदावर गंडांतर आले आहे.