छत्रपती संभाजीनगर: मराठा आरक्षण लढ्याचे नेते मनोज जरांगे पाटील यांच्या बीड जिल्ह्यातील परळी वैजीनाथ येथील सभेला पोलिसांनी परवानगी नाकारली आहे. याविरोधात मुंबई उच्च न्यायालयाच्या औरंगाबाद खंडपीठात धाव घेण्यात आली आहे. खंडपीठाचे न्या. मंगेश पाटील आणि न्या. शैलेश ब्रह्मे यांच्यासमोर बुधवारी सकाळी साडेदहा वाजता सुनावणी होणार आहे.
भाजपने आधी शड्डू ठोकला, निवडणूक जाहीर होताच माघार, कल्याणमध्ये शिंदेंच्या नावावर शिक्कामोर्तबपरळी येथील मार्केट यार्डात मनोज जरांगे यांची २० मार्च रोजी सायंकाळी सहा वाजता जाहीर सभा आयोजित करण्यात आली आहे. मार्केट यार्डाच्या जागेत सभा घेण्यात ना हरकत देण्यात आली आहे. पोलीस निरीक्षक परळी वैजीनाथ यांच्याकडे १३ मार्च रोजी संयोजकांच्या वतीने परवानगी मागण्यात आली. पोलिसांनी १६ मार्चला काही अटी शर्ती घातल्या होत्या. याविरोधात संयोजक यांनी जिल्हा न्यायदंडाधिकारी यांच्यासमोर अर्ज दाखल केला.

सुनावणीत लोकसभा २०२४ ची आचारसंहिता लागू झाली असल्याने जात, धर्म, भाषेवर एकत्र येऊ नका, असे आदेश देण्यात आले. जिल्हा न्यायदंडाधिकारी यांच्या आदेशाच्या अनुषंगाने पोलिसांनी १७ मार्च रोजी संयोजकांना नोटीस बजावून सभा रद्द करण्यास सांगितले. अन्यथा, कारवाई केली जाईल, असे स्पष्ट केले. पोलिसांच्या नोटीसला सभेचे संयोजक दत्तात्रय विठ्ठलराव गव्हाणे आणि व्यंकटेश बाबुराव शिंदे यांनी अॅड. सुदर्शन साळुंके यांच्यामार्फत खंडपीठात आव्हान दिले आहे.