म. टा. प्रतिनिधी, नाशिक : शाळा-महाविद्यालयांत परीक्षा सुरू असताना कॉलेजरोड व गंगापूररोड परिसरातून कर्णकर्कश आवाज करीत जाणाऱ्या दुचाकीस्वारांना पोलिसांनी दणका दिला आहे. २२ सायलेन्सर जप्त करून गंगापूर पोलिसांनी अशा कर्णकर्कश दुचाकींना ‘ब्रेक’ लावला आहे. या दुचाकीस्वारांकडून २१ हजारांचा दंडही वसूल करण्यात आला आहे.पोलिस आयुक्त संदीप कर्णिक यांच्या सूचनेनुसार उपायुक्त किरणकुमार चव्हाण व सहायक आयुक्त डॉ. सिद्धेश्वर धुमाळ यांनी मोठ्या आवाजात सायलेन्सर असलेल्या दुचाकींवर कारवाईचे निर्देश दिले. त्यानुसार गंगापूर पोलिस ठाण्याच्या पथकांनी कॉलेजरोड, महात्मानगर, गंगापूररोड, डी. के. नगर, सावरकरनगर भागात नाकाबंदी केली. त्यावेळी बावीस दुचाकीस्वारांवर कारवाई करून सायलेन्सर जप्त करण्यात आले. सात दुचाकींविरुद्ध ‘आरटीओ’मार्फत कारवाई करण्यात आली. या सर्व दुचाकीचालकांकडून एकवीस हजार रुपयांचा दंड वसूल केल्याची माहिती पोलिसांनी दिली.
कारवाई केलेली वाहने पोलिस ठाण्यात आणून शासकीय नियमानुसार असलेले सायलेन्सर लावल्याशिवाय सोडली जात नाहीत. कर्णकर्कश हॉर्न व मॉडिफाइड सायलेन्सर वापरणाऱ्यांविरुद्ध कारवाई सुरू ठेवणार आहोत.
-तृप्ती सोनवणे, वरिष्ठ पोलिस निरीक्षक, गंगापूर