मुंबई : ज्या लोकांनी मला निवडून दिले, त्यांचे अनेक प्रश्न प्रलंबित आहेत. शेवटी लोकप्रतिनिधींसाठी लोकांचे प्रश्न सोडविणे महत्त्वाचे असते. सत्तेत नसल्यामुळे विकास होत नसल्याकारणाने राज्याचे मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करतोय, असे स्पष्टीकरण रवींद्र वायकर यांनी दिले. वायकर यांनी अनेक कार्यकर्त्यांसह शिंदे सेनेचा भगवा ध्वज हाती घेतला. सत्तेत नसल्यामुळे विकास होत नाही, अशी उपरती त्यांना शिवसेना फुटीच्या २१ महिन्यांनी झाली. दुसरीकडे ईडीची चौकशी सुरू असल्याने आपण सत्तापक्षात प्रवेश केला का? अशी पत्रकारांनी विचारणा केल्यावर मात्र त्यांच्या निष्ठावंत कार्यकर्त्यांनी घोषणाबाजी करून मूळ प्रश्नावरून लक्ष वळविण्याचा प्रयत्न केला. दुसरीकडे वायकर आणि माझ्यामध्ये ‘एक माणूस’ संभ्रम निर्माण करत होता. पण समोरासमोर बसून चर्चा केल्यानंतर आमच्या दोघांच्याही मनातील समज-गैरसमज दूर झालेले आहेत, असे सांगून मुख्यमंत्री एकनाथ शिंदे यांनी वायकर यांचे पक्षात स्वागत केले.

मुंबई महापालिकेच्या मैदानासाठीचा आठ हजार चौरस मीटरच्या राखीव भूखंडावर फसवणुकीने पंचतारांकित हॉटेल उभारणी आणि मनी लॉंडरिंगप्रकरणी रवींद्र वायकर यांची सक्तवसुली संचालनालय अर्थात ईडीकडून चौकशी सुरू आहे. ईडी चौकशीचं शुक्लकाष्ठ मागे लागलेले आमदार रवींद्र वायकर यांच्या शिंदेसेनेच्या प्रवेशाची चर्चा गेल्या अनेक दिवसांपासून होती. अखेर त्यांनी आज रात्री नऊ वाजताच्या मुहूर्तावर मुख्यमंत्र्यांच्या ‘वर्षा’ निवासस्थानी भगवा ध्वज हाती घेत, देशातील मोदी सरकार आणि राज्यातील शिंदे सरकारचे कौतुक करत अधिकृतपणे प्रवेश केला.
ईडीचं शुक्लकाष्ठ मागे लागलेले रवींद्र वायकर अखेर शिंदेंच्या शिवसेनेत जाणार, मुहूर्त ठरला!

आरेच्या रस्त्यासाठी मला १७३ कोटींच्या निधीची मला आवश्यकता आहे. आरे रस्त्याचा प्रश्न प्रलंबित असल्याने लोक रडत आहेत. तिकडे ४५ किलोमीटरचे रस्ते होणे अत्यंत आवश्यक आहे. त्याचप्रमाणे रॉयलपंप सारख्या परिसरात उत्तम पाण्याची व्यवस्था नाहीये. अशा वेळेला धोरणात्मक निर्णय घेणे गरजेचे असते. जर आपण असे निर्णय घेतले नाही तर कामे थांबतात. म्हणून प्रलंबित कामे पूर्ण करण्यासाठी मी मुख्यमंत्री शिंदे यांच्या नेतृत्वात काम करण्याचा निर्णय घेतला, असे सांगून त्यांनी आपल्याजवळील प्रलंबित कामांच्या प्रस्तावांची नस्ती मुख्यमंत्री शिंदे यांच्या हवाली केली.

रवींद्र वायकर यांची राजकीय कारकीर्द

• रवींद्र वायकर हे शिवसेनेचे ३ टर्मचे आमदार आहेत
• गेली १५ वर्ष ते जोगेश्वरी मतदारसंघातून निवडून येतात
• त्याआधी त्यांनी मुंबई महापालिकेत स्थायी समितीचे अध्यक्ष म्हणून काम केलं
• शिवसेनेकडून ते चार वेळा नगरसेवक राहिलेले आहेत
• फडणवीस यांच्या नेतृत्वातील सरकारमध्ये त्यांनी राज्यमंत्री म्हणूनही काम केलंय