पुणे: राज्यातील महायुती सरकारमधील काही महत्त्वाच्या नेत्यांच्या भ्रष्टाचाराच्या फाईल माझ्याकडे आहेत. आगामी काळात या फाईल विधिमंडळात किंवा जनतेच्या दरबारात मांडून महायुती सरकारचा भ्रष्टाचार उघड करणार असल्याचे राष्ट्रवादी काँग्रेस पक्ष – शरदचंद्र पवार पक्षाचे आमदार रोहित पवार यांनी रविवारी पत्रकार परिषदेत सांगितले.राष्ट्रवादी काँग्रेस पक्षात फूट पडल्यानंतर माझ्यावर जलद गतीने कारवाई होत असल्याचा आरोपही पवार यांनी केला. या फाईल निनावी व्यक्तीने माझ्या कार्यालयात पाठवल्या असून एकूण ८ ते ९ फाईल आहेत. यामध्ये भारतीय जनता पक्षाचे दोन ओबीसी नेते आहेत. तर अन्य फाईल एकनाथ शिंदे आणि अजित पवार गटाच्या नेत्यांच्या आहेत. या सरकारच्या काळात राज्यात रुग्णवाहिकांमध्ये मोठा भ्रष्टाचार झाला आहे. यामध्ये सरकारमधील मोठे मंत्री सहभागी आहेत. याची माहिती जनतेसमोर आणणार असल्याचे पवार म्हणाले.
जेवढ्या होत्या तितक्या जागा मिळणार का? पत्रकारांच्या प्रश्नावर अजित पवारांचं मिश्कील उत्तर, म्हणाले अरे…
रोहित पवार यांच्या बारामती अ‍ॅग्रोने खरेदी केलेल्या छत्रपती संभाजीनगरातील कन्नड सहकारी साखर कारखान्यावर दोन दिवसांपुर्वी ईडीने कारवाई केली. याबाबत माहिती देण्यासाठी आयोजित केलेल्या पत्रकार परिषदेत पवार बोलत होते. राष्ट्रवादी काँग्रेस पक्ष – शरदचंद्र पवार पक्षाचे शहराध्यक्ष प्रशांत जगताप, प्रवक्ता विकास लवांडे, रविकांत तुपकर आदी उपस्थित होते.

मी राज्यभरात काढलेल्या युवा संघर्ष यात्रेला नागरिकांचा प्रचंड प्रतिसाद मिळाला. त्याचवेळी नोटीस येईल असा अंदाज होता. मी खरेदी केलेल्या कन्नड कारखान्यात काहीही गैरव्यवहार नसून केवळ निवडणुका डोळ्यासमोर ठेवून कारवाई केली जात आहे. राज्यभरात मी फिरू नये. लोकांमध्ये जावू नये, यासाठी कदाचित पुढचे दोन तीन महिने मला तुरुंगात टाकण्याची शक्यता आहे, असे रोहित पवार म्हणाले. रोहित पवार म्हणाले की, ईडीने कन्नड सहकारी साखर कारखान्यावर केलेल्या कारवाईची माहिती समाज माध्यमांच्या माध्यमातून मिळाली. मात्र, अद्याप याबाबत प्रत्यक्षरीत्या माझ्याकडे कागदपत्रे आलेले नाही. प्रत्यक्ष ते मिळाल्यानंतर न्यायालयात जाण्याची तयारी केली आहे.

२००९ साली कन्नड कारखाना विकण्याची नोटीस होती. ३२ कोटी रुपयांत ते विकणार होते. मात्र, कुणीही खरेदीदार मिळाले नाही. त्यांनतर दुसर्‍या जाहिरातीत ४५ कोटी रक्कम झाली. त्यानंतर बारामती अ‍ॅग्रोने ५ कोटी अतिरिक्त टाकून ५० कोटींना हा कारखाना खरेदी केला. त्यामुळे मला यामध्ये काही करायचेच असते तर ३२ कोटी रक्कम असतानाच विकत घेतला असता. यामध्ये कोणताही भ्रष्टाचार झालेला नाही. जरंडेश्वर कारखान्याला देखील नोटीस आली होती. त्याचे काय झाले? माझ्यावर केवळ राजकीय सुडापोटी ही कारवाई केली जात आहे. मी सोमवार ११ मार्चला सकाळी मी कन्नड कारखान्यावर जाणार असून तेथील कामगार, नागरिकांना भेटणार असल्याचेही पवार यांनी सांगितले.

बंद पडलेला कारखाना मी ५० कोटींना खरेदी केला तरीही माझ्यावर आरोप केले जातात. दुसरीकडे सत्ताधार्‍यांनी १० ते १५ कोटींत कारखाने खरेदी केले. एक कारखाना तर ४ कोटींत खरेदी झाला. त्यांची चौकशी होत नाही. भाजपसोबत गेलेल्या लोकांवर कारवाई होत नाही, अशी सध्याची परिस्थिती आहे. मात्र, त्यांच्यासोबत गेलेल्यांना आज तिकीट मिळविण्यासाठी दिल्ली दरबारी फेर्‍या माराव्या लागत आहेत. या माध्यमातून भाजपकडून त्यांची ताकद कमी केली जात आहे. लोकसभेनंतर विधानसभेला देखील हेच होणार असून या लोकांनी स्वाभिमान गहाण ठेवल्याची टिका रोहित पवार यांनी केली.