म. टा. प्रतिनिधी, पुणे

एकतर्फी प्रेमातून एका तरुणाने महिलेचा घरापर्यंत पाठलाग करून जबरदस्ती घरात प्रवेश केला. महिलेने आणि तिच्या सासूने तरुणाला विरोध केला असता, त्याने गॅस सिलिंडरने दोघींना मारहाण करून, घराचा दरवाजा तोडून पळ काढला. ही घटना कोंढव्यातील शिवनेरी नगर परिसरात घडली.

या प्रकरणी, २६ वर्षीय महिलेने कोंढवा पोलिस ठाण्यात तक्रार दिली आहे. त्यानुसार पोलिसांनी भिमाशंकर (पूर्ण नाव पत्ता माहिती नाही) या व्यक्तीच्या विरोधात गुन्हा दाखल केला आहे. ही घटना सात मार्चला दुपारी तीनच्या सुमारास घडली.

पोलिसांनी दिलेल्या माहितीनुसार, आरोपी हा तक्रारदार महिला काम करत असलेल्या ठिकाणी काम करतो. आरोपीने महिलेला तू मला खूप आवडतेस, असे म्हणत प्रेम भावना व्यक्त केली होती. त्यावेळी महिलेने “मी विवाहित असून, मला दोन मुले आहेत. तू मला परत त्रास देऊ नको,” असे सांगितले होते. मात्र, त्या नंतरही आरोपीने जबरदस्तीने महिलेचा पाठलाग करून तिच्या घरात घुसण्याचा प्रयत्न केला. दरम्यान, त्याला महिलेने विरोध केला. मात्र, तो घरात घुसला. त्यावेळी महिलेची सासू तिच्या मदतीला धावून आली. तिने आरोपीला जाब विचारला.

त्यावेळी आरोपी पळून जाण्याचा प्रयत्न करू लागला. तेव्हा तक्रारदार महिलेच्या जावेने दरवाजा बंद करून घेतला. त्यामुळे आरोपीने गॅस सिलिंडरने घराचा दरवाजा तोडून पळण्याचा प्रयत्न केला असता, सासूने त्याला अडवले. आरोपीने तक्रारदार महिलेच्या सासूच्या डोक्यात आणि तक्रारदार महिलेच्या पाठीत सिलिंडर मारून दोघींना जखमी केले. त्यानंतर घराचा दरवाजा तोडून पळ काढल्याचे तक्रारीत नमूद आहे. याचा तपास सहायक निरीक्षक विकास बाबर करीत आहेत.