म. टा. प्रतिनिधी, पिंपरी: मावळ लोकसभा मतदारसंघातील सध्याची राजकीय परिस्थिती लक्षात घेता कमळ या चिन्हावर निवडणूक लढवावी, अशी मागणी भारतीय जनता पक्षाकडून होऊ लागली आहे. त्यामुळे शिवसेनेचे खासदार श्रीरंग बारणे यांच्यासमोरील अडचणीत वाढ होण्याची शक्यता आहे.मावळ लोकसभा मतदारसंघ अस्तित्त्वात आल्यापासून या ठिकाणी शिवसेनेचा उमेदवार निवडून येत आहे. गजानन बाबर यांच्यापाठोपाठ सलग दोन वेळा श्रीरंग बारणे निवडून आले आहेत. ते तिसऱ्यांदा महायुतीच्या माध्यमातून निवडणूक लढविण्याच्या तयारीत आहेत. त्या अनुषंगाने विधानसभा मतदारसंघात बैठकांचे सत्र चालू आहे. शिवसेनेच्या शिंदे गटाचे प्रमुख शिलेदार म्हणून बारणे पुन्हा उमेदवार असतील, असा दावा समर्थकांकडून केला जात आहे.
मतदारसंघात भाजपचा वरचष्मा
मावळ लोकसभा मतदारसंघातील चिंचवड आणि पनवेल विधानसभा मतदारसंघातून भाजपचे अनुक्रमे अश्विनी जगताप, प्रशांत ठाकूर प्रतिनिधित्व करीत आहेत. उरणमधून अपक्ष आमदार महेश बाल्दी यांनी भाजपला पाठिंबा दर्शविला आहे. पिंपरी आणि मावळमधून राष्ट्रवादी काँग्रेसचे अण्णा बनसोडे, सुनील शेळके प्रतिनिधित्व करीत आहेत. कर्जतमधून शिवसेनेचे महेंद्र थोरवे एकमेव आमदार आहेत. ही राजकीय परिस्थिती लक्षात घेता सहापैकी तीन ठिकाणी भाजपचे आमदार असून, पक्षाची ही ताकद मोठी असल्याचा दावा केला जात आहे.
पिंपरी, पनवेल भाजपच्या ताब्यात
पिंपरी-चिंचवड आणि पनवेल या दोन्ही महापालिकांमध्ये भाजपची एकहाती सत्ता आहे. अनेक ग्रामपंचायती ताब्यात आहेत. त्यामुळे मावळमध्ये महायुतीकडून कमळ या चिन्हावर निवडणूक लढविली जावी, अशी मागणी भाजपकडून केली जात आहे. या संदर्भात कर्जत येथे नुकत्याच झालेल्या पक्षाच्या कोअर कमिटीच्या बैठकीत गांभीर्याने चर्चा झाली. ही बाब गोव्याचे मुख्यमंत्री प्रमोद सावंत यांच्याही निदर्शनास आणून देण्यात आली. ‘अब की बार, चार सौ पार’ हे उद्दिष्ट साध्य करण्यात मावळचा सहभाग असावा, अशी इच्छा व्यक्त येत आहे.
मावळमधील महायुतीच्या उमेदवाराने कमळ या चिन्हावर निवडणूक लढवावी, अशी कार्यकर्त्यांची भावना आहे. त्यामुळे ही जागा आम्हांला मिळावी, अशी मागणी पक्षश्रेष्ठींकडे केली आहे.
– राजू दुर्गे, प्रवक्ते, भाजप पिंपरी-चिंचवड
जागावाटपात आग्रह धरणे प्रत्येक पक्षाचा अधिकार आहे. मी दोनदा शिवसेनेकडून निवडणूक लढवली आहे. शेवटी मुख्यमंत्री एकनाथ शिंदे घेतील, तो निर्णय मला मान्य असेल.
– श्रीरंग बारणे, खासदार, मावळ