मुंबई: निवडणूक आयोगाने शरद पवार यांच्या राष्ट्रवादी काँग्रेस पक्ष – शरदचंद्र पवार या पक्षाला तुतारी हे नवं निवडणूक चिन्ह दिले आहे. महाराष्ट्राच्या राजकारणात सातत्याने मोठ्या घडामोडी घडत आहेत. दरम्यान महाराष्ट्र विधानसभा आणि निवडणूक आयोगाने अजित पवार यांना राष्ट्रवादीचे खरे दावेदार म्हणून स्वीकारले होते. यानंतर अजित पवार विरुद्ध शरद पवार आणि सुप्रिया सुळे यांच्यातील शाब्दिक युद्ध तीव्र झाले. दरम्यान, आता शरद पवार यांच्या समर्थकांसाठी आनंदाची बातमी आली आहे. शरद पवार यांच्या पक्षाला आता नवे निवडणूक चिन्ह मिळाले आहे. या पक्षाचे नाव ‘राष्ट्रवादी काँग्रेस पार्टी शरदचंद्र पवार’ म्हणजेच राष्ट्रवादी शरदचंद्र पवार असे असेल आणि निवडणूक चिन्ह तुतारी वाजवणारा माणूस आहे.शरद पवार यांच्या पक्षाला निवडणूक आयोगाकडून चिन्ह मिळाले आहे. नवीन निवडणूक चिन्हाचा संदर्भ देत पक्षाने सांगितले की, ही आमच्यासाठी अभिमानाची बाब आहे. पक्षाच्या अधिकृत सोशल मीडिया अकाऊंटवर ही माहिती देण्यात आली आहे. तसंच चिन्ह मिळाल्यानंतर प्रतिक्रिया मांडली आहे. याबाबतची पोस्ट सोशल मीडियावर शेअर केली आहे.
माझा पक्षात टिश्यू पेपर म्हणून वापर केल्याबद्दल धन्यवाद म्हणत शिल्पा बोडखेंचा ठाकरे गटाला रामराम

पोस्टमध्ये नेमकं काय लिहिलं?

“एक तुतारी द्या मज आणुनि
फुंकिन मी जी स्वप्राणाने
भेदुनि टाकिन सगळी गगने
दीर्घ जिच्या त्या किंकाळीने
अशी तुतारी द्या मजलागुनी!”

“महाराष्ट्राच्या इतिहासात छत्रपती शिवरायांच्या शौर्यानं ज्या तुतारीने दिल्लीच्या तख्ताच्याही कानठळ्या बसवल्या होत्या, तीच ‘तुतारी’ आज निवडणूक चिन्ह म्हणून निश्चित होणं ही ‘राष्ट्रवादी काँग्रेस पक्ष- शरदचंद्र पवार’साठी गौरवास्पद बाब आहे. महाराष्ट्राचं आराध्यदैवत छत्रपती शिवाजी महाराज, फुले, शाहू, आंबेडकरांच्या पुरोगामी विचारांनी, आदरणीय खा. शरदचंद्र पवार साहेबांच्या साथीने दिल्लीच्या तख्ताला हादरवून सोडण्यासाठी हीच ‘तुतारी’ पुन्हा एकदा रणशिंग फुंकण्याकरिता सज्ज आहे!”

जितेंद्र आव्हाडांची प्रतिक्रिया
राष्ट्रवादी काँग्रेस पक्ष – शरदचंद्र पवार या पक्षाच्या सोशल मीडिया अकाऊंटवर अशी पोस्ट लिहित विरोधकांना आव्हानही केल्याचे दिसत आहे. दरम्यान यानंतर सर्व स्तरांतून यावर प्रतिक्रिया येत आहे. यावर जितेंद्र आव्हाडांनी ट्विट करत प्रतिक्रिया दिली आहे. ते म्हणाले की, हा महाराष्ट्राच्या जनतेच्या मनातील संकेत आहे. राष्ट्रवादी काँग्रेस पक्ष (शरदचंद्र पवार) यांना निवडणूक आयोगाने निशाणी दिली अन् निशाणी काय दिली तर “तुतारी”! एका योद्ध्याच्या हाती तुतारी दिली… या योद्धाचे नाव आहे, शरद पवार ! ८४ वर्षांचे शरद पवार, ते परत एकदा लढाईला उतरलेत. हा संकेत वेगळाच संदेश देऊन जातो. महाराष्ट्र युद्धासाठी तयार आहे. युद्ध अधर्माविरूद्ध आहे..अन् या युद्धाची तुतारी वाजवायचे काम निवडणूक आयोगानेच केलेय.
आता थांबायचे नाही लढायचे आणि जिंकायचे
अब रूकना नही, लढना है और जितना है!