पुणे: पुण्यातील ससून रुग्णालय हे गुन्हेगारांसाठी पोलिसांना गुंगारा देण्याचं ठिकाणी बनलं आहे. ससून रुग्णालयातून या पूर्वी ड्रग्स माफिया ललित पाटील पळून गेला होता. तर आज कुख्यात गुंड शरद मोहोळ याच्या पत्नीला धमकी देणारा आरोपी फरार झाला आहे. शरद मोहोळ यांच्या पत्नी स्वाती मोहोळ यांच्या सोशल मीडिया अकाउंटवर अश्लील भाषेत कमेंट केल्याप्रकरणी त्याच्यावर सायबर पोलिस ठाण्यात गुन्हा दाखल करण्यात आला आहे. मात्र, आता त्याने ससून रुग्णालयातून पळ काढल्यामुळे पोलिस कर्मचाऱ्यांची फजिती उडाली आहे.
ससून रुग्णालयाच्या दारात पुणे पोलिसांनी दोन कोटींचा ड्रग्स जप्त केला होता. मात्र, त्यानंतर ड्रग्स माफिया ललित पाटील याने ससून मधून धूम ठोकली होती. दरम्यान पोलिसांनी मोठी नाचक्की झाली होती, राजकीय तसेच सर्व सामान्य नागरिकांमधून पुणे पोलिसांवर टीका होत होती. मात्र, आज पुन्हा ससूनमधून एक महत्वाचा आरोपी फरार झाला आहे.
मार्शल लुईस लिलाकर (रा. आकुर्डी) असं या फरार झालेल्या आरोपीच नाव आहे. मार्शल लुईस याच्यावर गुंड शरद मोहळ याच्या पत्नीच्या सोशियल मीडिया अकाउंटवर अश्लील शिवीगाळ करत कमेंट केल्या प्रकरणी त्याच्यावर सायबर पोलिस ठाण्यात ८१/२३ कलम ५००,५०६,५०९ तांत्रिक अधिनियम उल्लंघन केल्या प्रकरणी गुन्हा दाखल आहे.
मार्शल लुईस लिलाकर हा येरवडा जेलमधून त्याची प्रकृती अस्वस्थ झाल्यामुळे त्याला औषध उपचारासाठी ससून रुग्णालयात दाखल करण्यात आलं होतं. दरम्यान, त्याने संधी साधली आणि फरार झाला.