गजानन पवार, हिंगोली : हिंगोली शहरालगत असलेल्या गारमाळ भागात अनोळखी व्यक्तीचा मृतदेह आढळला. कृत्रीम पायावरून ओळख पटवत हा मृतदेह औंढा नागनाथ तालुक्यातील केळी येथील सुरेश सांगळे (वय ३५) याचा असल्याचं स्पष्ट झालं आहे. पोलिसांनी आज हट्टा शिवारातून संशयीत आरोपीला ताब्यात घेतलं असून, त्याची सखोल चौकशी आता सुरु केली आहे. हिंगोली शहराजवळील गारमाळ भागात एका व्यक्तीचा मृतदेह शुक्रवारी सायंकाळी आढळून आला होता. मृतदेहाचा चेहरा दगडाने ठेचलेला असल्यामुळे ओळख पटवणे कठीण झालं होतं.
पोलिस अधिक्षक जी. श्रीधर, अप्पर पोलीस अधिक्षक अर्चना पाटील यांच्या मार्गदर्शनाखाली पोलीस निरीक्षक नरेंद्र पाडळकर, यांच्या पोलीस पथकाने बेपत्ता व्यक्तीचा शोध घेण्यासाठी प्रयत्न सुरु केले. कृत्रीम पाय असलेला आणि गावातून बेपत्ता असलेल्या व्यक्तीची माहिती घेण्यास सुरवात केल्यानंतर औंढा नागनाथ पोलीस ठाण्याचे जमादार संदीप टाक यांनी त्यांच्या परिसरातील बेपत्ता तरुणाची माहिती दिली होती. यावरून मृतदेह सुरेश सांगळे याचा असल्याचे स्पष्ट झालं आहे.
पोलिसांनी हा खुनाचा प्रकार असल्याचे प्राथमिक चौकशीत स्पष्ट झाल्यानंतर आरोपींची माहिती घेण्यास सुरवात केली आहे. मयत सुरेश याच्यासोबत कोण होते? याची सखोल माहिती घेतली. त्याच्यासोबत गावातीलच हनुमान सांगळे हा तरुण असल्याचे स्पष्ट झालं. पोलिसांनी त्याचा शोध सुरु केला. मात्र, तो हट्टा परिसरातून जात असल्याची माहिती मिळाल्यानंतर पोलिसांनी हट्टा पोलिस ठाण्याचे सहाय्यक पोलिस निरीक्षक गजानन बोराटे यांना माहिती दिली. दरम्यान, आज पहाटे हनुमान यास संशयावरून ताब्यात घेतलं आहे. पोलिसांनी त्याची चौकशी सुरु केली असता खुनाचा गुन्हा दाखल होण्यापूर्वीच पोलिसांनी संशयीत आरोपीस ताब्यात घेतले. मयत सुरेश यांच्या खुनाचं नेमकं कारण काय होते? याचा तपास पोलीस आता करत आहेत.