म. टा. प्रतिनिधी, पुणे: राज्याच्या कोणत्याही भागातून पुण्यातील एखाद्या सरकारी पदावर ‘पोस्टिंग’ झाल्यानंतर सनदी अधिकाऱ्यांना पुणे सोडवत नसल्याचे पुन्हा पुन्हा स्पष्ट होत आहे. पुण्यात सनदी अधिकाऱ्यांच्या २५पेक्षा अधिक जागा असून, गेल्या १० ते १५ वर्षांत अनेक महत्त्वाच्या अधिकाऱ्यांची बदली एका खात्यातून दुसऱ्या खात्यात झाली खरी; पण ‘पुणे मुक्काम’ कायम राहिला आहे. सरासरी तीन वर्षांनी सनदी अधिकाऱ्यांच्या इतरत्र शहरांत बदल्या होणे अपेक्षित असताना पुण्यात काही अधिकाऱ्यांचा सेवा काळ १० वर्षे किंवा त्याहून अधिक झाला आहे.

राज्य सरकारने सनदी अधिकाऱ्यांच्या नुकत्याच बदल्या केल्या. त्यात पुण्याच्या जिल्हाधिकारीपदी डॉ. सुहास दिवसे यांच्या जागी डॉ. राजेश देशमुख यांची आणि जिल्हाधिकारी डॉ. राजेश देशमुख यांची दिवसे होते, त्या क्रीडा आयुक्तपदी बदली करण्यात आली.

दिवसे सर्वाधिक काळ पुण्यात

दिवसे यांनी २००४ ते २००७मध्ये पुण्यात निवासी उपजिल्हाधिकारी पदावर काम पाहिले आहे. त्यांची कारकीर्द पुण्यात सुरू झाली. पुण्यात प्रोबेशनरी उपजिल्हाधिकारी म्हणून १९९५मध्ये त्यांनी काम केले. त्यानंतर खेड तालुक्याचे प्रांताधिकारी, अन्नधान्य वितरण अधिकारी, रोजगार हमी विभाग, पुणे विभागीय आयुक्तालयात विभागीय उपायुक्त, पुणे महानगर प्रदेश विकास प्राधिकरणाचे (पीएमआरडीए) आयुक्त, पिंपरी-चिंचवड नवनगर विकास प्राधिकरणाच्या (पीसीएनटीडीए) मुख्य कार्यकारी अधिकारी, कृषी आयुक्त, आणि राज्याचे क्रीडा आयुक्त म्हणूनही त्यांनी जबाबदारी सांभाळली. पुण्याचे जिल्हाधिकारी म्हणूनही त्यांच्यावर जबाबदारी देण्यात आली आहे. त्यामुळे पुण्यात सर्वाधिक काळ विविध पदांवर काम करून पुण्यात राहणाऱ्या अधिकाऱ्यांमध्ये दिवसे यांचे नाव आघाडीवर आहे.

शेतकरी पुन्हा राजधानी दिल्लीच्या वेशीवर, संसदेवर धडक देण्याचा निर्धार, नेमक्या मागण्या काय?

करीर यांचे पुणे वास्तव्य मोठे

मुख्य सचिव नितीन करीर यांनी यापूर्वी पुण्यात सर्वाधिक काळ काम केले. हवेलीचे गटविकास अधिकारी, प्रांताधिकारी, जिल्हा परिषदेचे मुख्य कार्यकारी अधिकारी, नोंदणी महानिरीक्षक, पुणे महापालिका आयुक्त आणि त्यानंतर विभागीय आयुक्त म्हणून पुण्यात अनेक वर्षे वास्तव्य केले. त्यांच्यानंतर २००४मध्ये प्रभाकर देशमुख जिल्हाधिकारी झाले. २००८नंतर कृषी आयुक्त, विभागीय आयुक्त पदावर त्यांनी काम केले.

दळवींचेही काम पुण्यातच

चंद्रकांत दळवी २००९मध्ये पुण्याचे जिल्हाधिकारी झाले. ‘यशदा’चे महासंचालक, जमाबंदी आयुक्त, सहकार आयुक्त आणि त्यानंतर पुणे विभागाचे विभागीय आयुक्त म्हणूनही त्यांनी अनेक वर्षे पुण्यात वास्तव्य केले. विकास देशमुख यांनी जिल्हाधिकारी, महापालिका आयुक्त; तसेच कृषी आयुक्त म्हणूनही अनेक वर्षे पुण्यातच काम केले आहे. अनेक वर्षे साखर आयुक्त असलेले शेखर गायकवाड यांनी १९९७मध्ये हवेलीचे प्रांताधिकारी, ‘यशदा’चे निबंधक, भूजल सर्वेक्षण विभागाचे संचालक, पुणे महापालिकेचे आयुक्त म्हणून पुण्यात अनेक वर्षे काम केले. अनिल कवडे यांनी प्रांताधिकारी, जिल्हा परिषदेचे मुख्य कार्यकारी अधिकारी, नोंदणी महानिरीक्षक, सहकार आयुक्त पदावर काम केले. आता साखर आयुक्त पदावर त्यांची नियुक्ती झाली आहे.

पालघर लोकसभेच्या जागेवरून शिंदे गट-भाजपमध्ये चढाओढ, प्रस्ताव वरिष्ठांच्या कोर्टात

राव, हर्डीकरही पुण्यात

सौरव राव यांनी जिल्हाधिकारी पदानंतर महापालिका आयुक्त, विभागीय आयुक्तपदी काम करून १० वर्षांचा कालावधी पुण्यात घालवला आहे. आता पुन्हा सहकार आयुक्तपदी त्यांची नियुक्ती करण्यात आल्याने त्यांचे पुण्यातील वास्तव्य वाढले आहे. श्रावण हर्डीकरसुद्धा पिंपरी-चिंचवड महापालिकेचे आयुक्त, नोंदणी महानिरीक्षक झाल्यानंतर पुन्हा मेट्रोचे व्यवस्थापकीय संचालक म्हणून पुण्यात परतले आहेत. सध्या ‘यशदा’चे महासंचालक असलेले एस. चोकलिंगम हे शिक्षण आयुक्त, जमाबंदी आयुक्त, विभागीय आयुक्त म्हणून अनेक वर्षे पुण्यातच राहिले आहेत. यावरून विविध खात्यांमध्ये काम करताना पुण्यातच राहण्यास सनदी अधिकाऱ्यांकडून पसंती दिली जात आहे.

पसंतीसाठी पुणेच का?

– शिक्षणाचे माहेरघर म्हणून मुलांच्या शिक्षणाची पुण्यात व्यवस्था.

– राज्य स्तरावरील बहुतांश कार्यालये पुण्यातच. त्यामुळे कामाच्या दृष्टीने सोपे.

– राहण्यासाठी देशातील उत्तम शहरांपैकी एक पुणे शहर.

– आर्थिक, सामाजिक, दळणवळण, औद्योगिक दृष्टीने महत्त्वाचे शहर.

– राजकीयदृष्ट्या सोयीचे.

– सर्वच पक्षांशी संबंध राहिल्याने राजकरण्यांकडून फारसा त्रास नाही.