मुंबई : पर्यावरण संवर्धनासाठी महापालिकेच्या उद्यान विभागाने घाटकोपर येथील एका जमिनीवर मियावाकी वन साकारले. या उद्यानात तब्बल १० हजारांहून अधिक झाडांची लागवड केली. मात्र, आता या ठिकाणी पालिकेनेच दवाखाना व कब्रस्तानचा विस्तार करण्याचे प्रस्तावित केले आहे. त्यास स्थानिक रहिवाशांनी तीव्र विरोध केला असून उद्यान वाचवण्यासाठी ‘चिपको’ आंदोलन केले.
मुंबईत अधिकाधिक हिरवळ निर्माण करण्यासाठी पालिकेचे विविध पातळ्यांवर उपक्रम सुरू आहेत. त्यापैकीच एका उपक्रमानुसार घाटकोपर पश्चिम येथील लालबहादूर शास्त्री मार्गावरील सुमारे ९ हजार चौरस मीटर जागेवर १० हजार ५०० मियावाकी झाडांची लागवड दोन वर्षांपूर्वी करण्यात आली आहे. ही झाडे मोठ्या प्रमाणात बहरली असून जोमाने त्यांची वाढ झाली आहे. या उद्यानात ज्येष्ठ नागरिकांसह मुले व महिला खेळ, व्यायाम तसेच योगासने करण्यासाठी येतात. या उद्यानात आता शेजारच्या कब्रस्तानचा तसेच दवाखान्याचा विस्तार प्रस्तावित केला आहे. पालिकेच्या या कृतीला स्थानिकांनी तीव्र विरोध केला असून या विरोधात मुंबई उच्च न्यायालयात कॅव्हेट दाखल केल्याचे स्थानिक रहिवाशांनी सांगितले.
मुंबईत अधिकाधिक हिरवळ निर्माण करण्यासाठी पालिकेचे विविध पातळ्यांवर उपक्रम सुरू आहेत. त्यापैकीच एका उपक्रमानुसार घाटकोपर पश्चिम येथील लालबहादूर शास्त्री मार्गावरील सुमारे ९ हजार चौरस मीटर जागेवर १० हजार ५०० मियावाकी झाडांची लागवड दोन वर्षांपूर्वी करण्यात आली आहे. ही झाडे मोठ्या प्रमाणात बहरली असून जोमाने त्यांची वाढ झाली आहे. या उद्यानात ज्येष्ठ नागरिकांसह मुले व महिला खेळ, व्यायाम तसेच योगासने करण्यासाठी येतात. या उद्यानात आता शेजारच्या कब्रस्तानचा तसेच दवाखान्याचा विस्तार प्रस्तावित केला आहे. पालिकेच्या या कृतीला स्थानिकांनी तीव्र विरोध केला असून या विरोधात मुंबई उच्च न्यायालयात कॅव्हेट दाखल केल्याचे स्थानिक रहिवाशांनी सांगितले.
घाटकोपर पश्चिम येथील या मैदानाच्या मागील बाजूस आधीपासून कब्रस्तान असून स्थानिकांच्या मागणीनुसार त्याचा विस्तार करण्याबाबत विचार सुरू असल्याचे पालिकेच्या उद्यान विभागातील वरिष्ठ अधिकाऱ्याने सांगितले. याबाबत विकास नियोजन (डीपी) विभागाकडून प्रस्ताव प्राप्त झाला आहे. परिसरात पर्यायी जागा दिल्यास आम्ही तिथे दुसरे उद्यान विकसित करू, असे विकास नियोजन विभागाने स्पष्ट केले आहे. त्यामुळे सद्यस्थितीत येथील झाडांना हानी पोहोचणार नाही याची काळजी घेण्यात आल्याचे पालिका प्रशासनाकडून सांगण्यात आले.
स्थानिक लोकप्रतिनिधींकडूनही या प्रस्तावित विस्ताराला विरोध करणारी पत्रे पालिकेला पाठविण्यात आली आहेत. ती पत्रे विकास नियोजन विभागातील अधिकाऱ्यांना पाठवल्याचे या अधिकाऱ्याने सांगितले. घाटकोपर पश्चिम येथील भाजपचे माजी नगरसेवक व पालिकेचे माजी विरोधी पक्षनेते प्रवीण छेडा यांनी उद्यान हटविण्यास आपला तीव्र विरोध असल्याचे सांगितले. हे उद्यान स्थानिक नागरिकांच्या आरोग्यासाठी उत्तम जागा आहे. पालिकेने कब्रस्तान व दवाखान्यासाठी नवीन जागेचा शोध घ्यावा, अशी मागणी छेडा यांनी केली आहे.
आरक्षण उद्यानाचे, प्रस्ताव कब्रस्तानचा
या भूखंडावर उद्यानासाठी आरक्षण असून तेच कायम ठेवावे. निवासी क्षेत्रात कब्रस्तान विस्तार चुकीचा असल्याचे घाटकोपर येथील भाजपचे आमदार पराग शहा यांनी सांगितले. कब्रस्तानला विरोध नाही. मात्र, निवासी इमारतींच्या परिसरात ते पालिका कसे प्रस्तावित करते, असा प्रश्न शहा यांनी केला आहे.