खासदारांनी आपला ताफा थांबवून मदत कार्य करण्यात स्वतः पुढाकार घेतला. जखमींना उपचारासाठी रुग्णालयात दाखल करण्यासाठी रुग्णालयात पाठवण्याची व्यवस्था उपलब्ध केली. दरम्यान पोलीस कर्मचारी देखील घटनास्थळी दाखल झाल्यानंतर त्यांनाही बचाव कार्य करण्यासंदर्भात सूचना खासदारांनी दिल्या. डंपर आणि एसटीच्या झालेल्या या भीषण अपघातात एका दीड वर्षाच्या चिमुकल्याचा मृत्यू झाला असून १९ प्रवासी जखमी झाले आहेत. यातील सात प्रवासी गंभीररीत्या जखमी झाल्याने त्यांना धुंदलवाडी येथील वेदांता रुग्णालयात उपचारासाठी दाखल करण्यात आले आहे. त्याचप्रमाणे दहा प्रवाशांना मनोर येथील खाजगी रुग्णालयात आणि दोन प्रवाशांना मनोर येथील शासकीय रुग्णालयात दाखल करण्यात आले असून त्यांच्यावर उपचार सुरू आहेत.