म.टा. प्रतिनिधी, नागपूर: मोबाइल व पैसे चोरी केल्याच्या संशयातून दोघांनी ३५ वर्षीय युवकाची हत्या केली. ही थरारक घटना पारडी पोलिस ठाण्याच्या हद्दीतील नाका क्रमांक पाच परिसरात घडली. मृताची ओळख पटलेली नाही. पोलिसांनी खुनाचा गुन्हा दाखल करून दोघांना अटक केली. प्रमोद हरिभाऊ बडवे (वय ४२, रा. अंबेनगर) व सनीसिंग हनीसिंग रंधावा (वय ३६, नाका क्रमांक एकजवळ, पारडी), अशी अटकेतील मारेकऱ्यांची नावे आहेत. दोघेही आरामशिनमध्ये काम करीत असून नाक्याजवळ झोपतात.

शनिवारी सकाळी ३५ वर्षीय युवक नाका क्रमांक पाच परिसरात आला. याचदरम्यान प्रमोदचा मोबाइल व पैसे गायब झाले. मोबाइल व पैसे युवकानेच चोरल्याचा संशय प्रमोदला आला. प्रमोद व सनीसिंगने त्याची झडती घेतली असता मोबाइल आढळून आला नाही. मात्र त्यानेच मोबाइल चोरी केल्याचा दाट संशय प्रमोदला होता. प्रमोद आणि सनीसिंग यांनी लाकडी राफ्टरने युवकाच्या डोक्यावर वार केले व दोघेही पसार झाले. माहिती मिळताच पारडी पोलिसांचा ताफा तेथे पोहोचला. पोलिसांनी जखमी युवकाला मेयो हॉस्पिटलमध्ये दाखल केले असता उपचारादरम्यान त्याचा मृत्यू झाला. पोलिसांनी खुनाचा गुन्हा दाखल करून दोघांना अटक केली. घटनेच्या २४ तासानंतरही पोलिस मृतकाची ओळख पटवू शकले नाहीत.

पार्थ पवारांचं काय चाललंय? अजितदादांचं मावळ लोकसभेवर विशेष लक्ष, लेकाच्या मात्र दांड्या सुरुच

मेट्रो स्थानकासमोर आढळला मृतदेह

नागपूर : तहसील पोलिस ठाण्याच्या हद्दीतील दोसरभवन मेट्रो स्थानकासमोरील फुटपाथवर ५० वर्षीय इसमाचा मृतदेह आढळून आला. ही घटना शनिवारी सकाळी ११.३० वाजताच्या सुमारास घडली. मृताची ओळख पटलेली नाही. तहसील पोलिसांनी आकस्मिक मृत्यूची नोंद करून तपास सुरू केला आहे.

योग्य गुन्हा दाखल करणार, अंबादास दानवे जखमी प्रिया सिंहच्या भेटीसाठी इन्फिनिटी रुग्णालयात