महापालिकेच्या माध्यमातून युद्धपातळीवर डेंग्यू निर्मूलन मोहीम राबविली जात आहे. मात्र, डासांचा प्रादुर्भाव कमी होताना दिसत नाही. ऑगस्टमध्ये अवघे ४७ रुग्ण होते. त्यानंतर मात्र डेंग्यूबाधितांचा आकडा वाढतच राहिला आहे. सप्टेंबरमध्ये २६१, तर ऑक्टोबरमध्ये डेंग्यूचे १९३ बाधित आढळले होते. त्यानंतर डेंग्यूचा प्रादुर्भाव कमी होईल, अशी अपेक्षा असताना डेंग्यू रुग्णसंख्येचा आकडा वाढतच गेला. नोव्हेंबरमध्ये तब्बल पावणेतीनशे जणांना डेंग्यूची बाधा झाली. नोव्हेंबरअखेर कोसळलेल्या अवकाळी पावसामुळे ठिकठिकाणी साचलेली पाण्याची डबकी डेंग्यूच्या प्रादुर्भावास हातभार लावणारी ठरली. त्यामुळे डिसेंबरच्या दोन आठवड्यांतच डेंग्यूचे १५० नवे बाधित आढळले आहेत. त्यामुळे डेंग्यूबाधितांचा एकूण आकडा आता एक हजार १३५ वर गेला आहे. डेंग्यूसदृश लक्षणे आढळलेल्या अद्यापही सुमारे १८० रुग्णांचे रक्त नमुने अहवाल तपासणीसाठी प्रयोगशाळेकडे प्रलंबित आहेत. हे अहवाल प्राप्त झाल्यानंतर डेंग्यू बाधितांचा आकडा आणखी वाढण्याची शक्यता आहे. डेंग्यूच्या डासांची उत्पत्तिस्थाने आढळल्याप्रकरणी शहरातील चार मोठ्या बांधकाम व्यावसायिकांना वैद्यकीय विभागाने दंडात्मक नोटीसा बजावल्या आहेत.

आतापर्यंत तीन बळी

ऑक्टोबर महिन्यात नाशिकरोड विभागातील आनंदनगर परिसरातील एका व्यावसायिकाचा डेंग्यूने मृत्यू झाल्याने थेट शासनाला दखल घ्यावी लागली. त्यानंतर नोव्हेंबर महिन्यात नवीन नाशिक विभागातील डीजीपीनगर-कामटवाडे परिरसरातील एका व्यक्तीचा डेंग्यूने मृत्यू झाला. पंचवटीतील म्हसरूळ परिसरातील ६५ वर्षीय वृद्ध महिलेसही डेंग्यूची लागण होऊन तिचा बळी गेला. त्यामुळे शहरात आतापर्यंत तिघांचा डेंग्यूने बळी गेला आहे. त्यामुळे यंत्रणांकडून प्रभावी उपाययोजना करणे अपेक्षित असतानाही त्या होत नसल्यामुळेच डेंग्यूचा प्रभाव वाढत असल्याचे चित्र आहे.
नाशिककरांनो, तुम्ही पित असलेलं पाणी शुध्द आहे का? जिल्ह्यात ‘या’ गावांचे पाणी दूषित, वाचा लिस्ट
डेंग्यूची महिनानिहाय रुग्णसंख्या
जानेवारी- १७
फेब्रुवारी- २८
मार्च- २८
एप्रिल- ८
मे- ९
जून- १३
जुलै – ३२
ऑगस्ट – ४७
सप्टेंबर- २६१
ऑक्टोबर- १९३
नोव्हेंबर- २७२
डिसेंबर- १५०